Абай облысында жергілікті имам 11 жасар қыз бала көлігімен қағып кеткен. Жәбірленуші алған жарақат салдарынан қаза тапты, деп хабарлайды Ulysmedia.kz.
АУЫЛ ИМАМЫ БАЛАНЫ ҚАҒЫП КЕТКЕН
Қайғылы оқиға 14 қазан күні Абай облысында болған. 44 жастағы жүргізуші шамамен сағат 11:40-та баланы қағып кеткен. Жол апатынан кейін ол жедел түрде зардап шеккен қызды ауруханаға жеткізген.
«Жол-көлік оқиғасы нәтижесінде кәмелетке толмаған бала Үржар аудандық ауруханасында алған жарақаттарынан қайтыс болды. Абай облысының полиция департаменті жол қозғалысы ережелерін бұзу және абайсызда адам өліміне әкелу фактісі бойынша сотқа дейінгі тергеуді бастады. Тергеу барысы облыстық полиция департаменті басшылығының бақылауында», – деп хабарлады департамент.
ИТТЕН ҮРКІП ҚАШҚАН
Облыстың бас имамы Асқар Мұқанов бұл ақпаратты растады.
«Көлікті ауыл мешітінің имамы жүргізгені рас. Оның айтуынша, көлік сағатына 40 шақырымнан аспайтын жылдамдықпен жүрген. Куәгерлердің айтуынша, қыз бала үйлердің бірінің ауласындағы байлаулы иттің үргенінен қорқып, жолға жүгіріп шыққан. Жүргізуші көлікті тоқтатуға үлгермеген», – делінген ресми хабарламада.
БҰҒАН ДЕЙІН
Түркістандық қарапайым имамдар «қоңыз теріп» қиналып кеткенін және Бас мүфти Наурызбай Өтпеновтың өңірге сапарына арнап молдалар қанша ақша жинағанын жеткізген.