Көкшетаудағы мектептердің бірінде дәретханаға бейнебақылау камерасы орнатылған. Бастамаға ата-аналардың көбі қарсы. Олар бізден ешкім рұқсат сұрамады деп отыр, деп хабарлайды Ulysmedia.kz “Информбюро” бағдарламасына сілтеме жасап.
Камералар №6 мектеп-лицейіндегі ұл балаларға арналған дәретханаға орнатылған. Білім бөлімінің өкілдері бұл шара қауіпсіздік үшін жасалғанын айтады. Себебі, әжетханада төбелес, әлімжеттік жиілеген. Оған қоса, мүлікті қирату деректері де азаймай тұр дейді мамандар. Осы тәртіп бұзушылықтардың алдын алу үшін бейнебақылау камераларын орнатуға мәжбүр болдық деп отыр мектеп ұжымы.
Сондай-ақ құрылғы тек дәретхананың дәлізін ғана түсіретіні айтылды. Ал ата-аналарға түсіндіру жұмыстары жүргізіліп жатыр.
Алдында бірнеше оқиға болған. Баланың құқық бұзушылығы. Қазіргі таңда біз видео бәрін қарап шыққан кезде камералар тек әжетхананың кіреберіс жағын, қол жуатын жерді, есікті түсіреді. Ал жеке балалардың кабинкалары бейнеге түспейді, – дейді Көкшетау қаласы білім бөлімі басшысының міндетін атқарушы Нажимеден Нұралин.
Еске салсақ, бұған дейін Атырау облысындағы мектептің дәретханасына бейнекамера орнатылғаны анықталған еді.