Астана қаласының мамандандырылған ауданаралық әкімшілік соты грант ала алмағаны үшін Ғылым және жоғары білім министрлігін сотқа берген талапкердің ісі бойынша шешім шығарды, деп хабарлайды Ulysmedia.kz.
МӘН-ЖАЙЫ
Соттың мәліметінше, арызданушы ҰБТ нәтижелері бойынша 140 баллдан 119 балл жинаған. 2024 жылдың 16 шілдесінде арызданушы М. Нархоз университетіне "B049 – құқық" бакалавриат мамандығы бойынша мемлекеттік білім беру гранттарын беру конкурсына қатысу үшін құжаттар тапсырған.
Ұлттық тестілеу орталығының деректеріне сәйкес 2024-2025 оқу жылына "B049 – құқық" мамандығына 150 грант бөлінгені анықталды. Алайда ғылым және жоғары білім министрінің 2024 жылғы 2 тамыздағы бұйрығымен 30 грант талапкерлерге “төтенше жағдайдағы өңірлер үшін" квотасы бойынша берілген.
Осылайша арызданушы М мемлекеттік грант ала алмаған.
СОТ ХАБАРЛАМАСЫ
Алайда кейінірек министрліктің 2024 жылғы 27 тамыздағы бұйрығына сәйкес, бас тартылған және игерілмеген гранттарды қайта бөлу нәтижесінде арызданушы М Нархоз университетінде "құқық" мамандығы бойынша мемлекеттік грант иегері атанды. Талапкер 2024 жылғы 2 тамыздағы бұйрықты даулап, сотқа шағынданған.
Астананың мамандандырылған ауданаралық әкімшілік сотының 2024 жылғы 17 желтоқсандағы шешімімен М.-ның талап қоюы қанағаттандырусыз қалдырылды. Даулы бұйрықпен талап қоюшының қандай да бір құқықтары бұзылған жоқ. Сот сұралып отырған грантты алған талап қоюшының іс-әрекетінде құқықты теріс пайдалану бар деп қарастырып, талап қоюды қанағаттандырудан бас тартты, – делінген сот хабарламасында.
Еске салсақ, бұған дейін талапкер грант жеңіп алғанына қарамастан министрлікті сотқа бергені туралы жазған едік.