Ресей мен АҚШ-тың жоғары деңгейлі дипломаттары 27 ақпанда Стамбулда елшіліктердің жұмысына қатысты кездесу өткізеді, деп хабарлайды Ulysmedia.kz.
РЕСЕЙ МЕН АҚШ ДИПЛОМАТТАРЫНЫҢ КЕЗДЕСУІ СТАМБУЛДА ӨТЕДІ
Бұл туралы Ресей Сыртқы істер министрі Сергей Лавров 26 ақпанда Дохада мәлімдеді.
"Мұндай кездесу ертең Стамбулда өтеді, оның қорытындысы бойынша біз қаншалықты жылдам әрі тиімді әрекет ете алатынымызды түсінеміз деп ойлаймын", – деп оның сөзін "Интерфакс" агенттігі келтіреді. Министрдің айтуынша, "жоғары деңгейдегі дипломаттар мен сарапшылар кездесіп, жүйелі мәселелерді талқылайды".
КРЕМЛЬ: ПУТИН МЕН ТРАМПТЫҢ КЕЗДЕСУІ ЖӨНІНДЕ ӘЗІРГЕ НАҚТЫЛЫҚ ЖОҚ
Осы ретте Кремль Ресей мен АҚШ президенттері Владимир Путин мен Дональд Трамптың мүмкін болатын келіссөздеріне қатысты пікір білдірді.
"Жеке кездесу туралы әзірге нақты ақпарат жоқ, бірақ оның өткізілуі тиіс екені түсінікті, сондай-ақ оның жақсы дайындалуы қажеттілігі екі тарапқа да айқын", – деп мәлімдеді Ресей президентінің баспасөз хатшысы Дмитрий Песков.
Оның айтуынша, "Эр-Риядтағы келіссөздерде мемлекет басшылары мен жоғары деңгейдегі делегациялар қол жеткізген уағдаластықтар кезең-кезеңімен жүзеге асырылып жатыр".
Песков сондай-ақ "сыртқы істер министрліктері желісі бойынша сараптамалық деңгейде байланыстар дайындалып жатқанын" растады.
ТРАМП: ЗЕЛЕНСКИЙ ВАШИНГТОНҒА БАРАДЫ
АҚШ президенті Дональд Трамптың айтуынша, Украина басшысы Владимир Зеленский 28 ақпанда Вашингтонға келіп, сирек кездесетін металдарға қатысты келісімге қол қоюы мүмкін.
"Қазіргі уақытта екі елдің ресми өкілдері келісімнің егжей-тегжейін пысықтауда", – деп мәлімдеді украиналық жоғары лауазымды шенеунік.
AFP агенттігінің хабарлауынша, Украина АҚШ әкімшілігімен келісім шарттарын мақұлдады және оны алдағы күндері қол қоюға дайын.