Атбасарда ЕЦ-166/4 түзеу мекемесінің бұрынғы 12 қызметкеріне қатысты сот ісі аяқталды. Іс 2023 жылғы тамызда болған оқиғаға байланысты қозғалған. Сол кезде әлеуметтік желіде сотталғандарға күш қолданылғаны түсірілген бейнежазбалар тараған еді. Іс бірнеше рет қайта қаралғаннан кейін сот колонияның бұрынғы қызметкерлерін лауазымдық өкілеттіктерін асыра пайдаланғаны үшін кінәлі деп таныды, деп хабарлайды Ulysmedia.kz.
13 қарашада Атбасар аудандық соты 12 айыпталушының әрқайсысына екі жылға бас бостандығын шектеу жазасын тағайындады. Алайда рақымшылыққа байланысты олардың тоғызының жаза мерзімі бір жылға қысқартылды. Bureau.kz мәліметінше, олар жазасын пробациялық бақылауда өтейді.
Қалған үш адам бұрын қамауда отырған уақыты ескеріліп, жазаны одан әрі өтеуден босатылды.
Сонымен қатар, сотталғандардың барлығы арнайы атақтарынан айырылып, оларға үш жыл бойы Ішкі істер министрлігі жүйесінде жұмыс істеуге тыйым салынды.
Сот жәбірленушілердің моральдық зиянды өтеу туралы азаматтық талаптарын ішінара қанағаттандырды. Үш адамға 1,5 миллион теңгеден өтемақы тағайындалды. Тағы 17 адамға 500 мыңнан 800 мың теңгеге дейін өтемақы төленеді.
2023 жылғы қыркүйекте әлеуметтік желілерде Атбасардағы түзеу мекемесінде түсірілген бейнежазбалар тарады. Онда сотталғандарға күш қолданылғаны көрінеді.
Бейнежазбалар жарияланғаннан кейін тексеру басталып, артынша азаптау дерегі бойынша қылмыстық іс қозғалды.
Бастапқыда іс бойынша 44 адам жәбірленуші деп танылған. Олардың арасында сол кезде колонияда жазасын өтеп жатқан азаматтық белсенді Тимур Дәнебаев та болды.
Дәнебаев өзіне бірнеше рет күш қолданылғанын мәлімдеген еді. Ол 2025 жылғы қыркүйекте бостандыққа шықты.
Қылмыстық-атқару жүйесі комитеті бастапқыда арнайы құралдардың қолданылуын сотталғандардың әрекетімен түсіндірген. Ведомство олардың кейбірін тәртіпсіздікті бастаған адамдар деп атаған.
Кейін Ішкі істер министрлігі тексеру жүргізілгенін хабарлады. Оның қорытындысы бойынша түзеу мекемесінің бірқатар қызметкері жұмыстан босатылды.
Сот процесі бір жылдан астам уақытқа созылып, іс бірнеше рет қайта қаралды.
2025 жылғы ақпанда алқабилер айыпталушыларды кінәсіз деп таныды. Алайда прокуратура бұл шешіммен келіспей, шағым түсірді.
2025 жылғы желтоқсанда іс қайта қаралғанымен, сот тағы да ақтау үкімін шығарды.
2026 жылғы қаңтарда прокуратура екінші рет наразылық білдіріп, наурызда іс қайта қарауға жіберілді.
Кейін айыптау бабы өзгертілді. Бастапқыда азаптау бойынша қозғалған іс Қазақстан Қылмыстық кодексінің 362-бабына, яғни билікті немесе лауазымдық өкілеттіктерді асыра пайдалану бабына ауыстырылды.