Берлин Ресей президенті Владимир Путиннің Украинада уақытша үкімет құру туралы ұсынысын үзілді-кесілді қабылдамай тастады. Бұл туралы Германия үкіметінің өкілі Штеффен Хебештрайт 28 наурыз, жұма күні мәлімдеді, деп хабарлайды Ulysmedia.kz.
БЕРЛИН РЕСЕЙДІҢ УКРАИНАДАҒЫ УАҚЫТША ҮКІМЕТ ҚҰРУ ТУРАЛЫ ШАҚЫРУЫН ҚАБЫЛДАМАДЫ
Оның айтуынша, Кремль украиналық көшбасшы Владимир Зеленскийдің заңдылығын үнемі жоққа шығарады. Алайда "Украинаға күн сайынғы шабуылдар арқылы Путин бұл елдегі мақсаты демократия емес екенін дәлелдеп отыр". Хебештрайт Зеленскийді "Украинаның заңды президенті" деп атап, "украиндықтардың атынан келіссөздер жүргізетін жалғыз тұлға" екенін айтты.
ЕУРОКОМИССИЯ ПУТИННІҢ МӘЛІМДЕМЕЛЕРІН НАСИХАТ ДЕП АТАДЫ
Еурокомиссия (ЕК) Путиннің мәлімдемелеріне түсініктеме беруден бас тартып, оларды насихат деп атады.
"Біз фактілерді мұқият зерттейміз, ал шындық мынада: бір жағында агрессор бар, екінші жағында бейбітшілікке ұмтылатын Украина тұр. Сондықтан біз Украинаны қолдаймыз және ұзақ, әділетті әрі тұрақты бейбітшілікті қамтамасыз етуге назар аударамыз", — деп қосты ол.
Хиппер сонымен қатар Путинді "соғыс қылмыскері" деп атап, оның әскери қылмыстары үшін іздеуде екенін еске салды.
ПУТИН УКРАИНАДАҒЫ "УАҚЫТША БАСҚАРУ" ҰСЫНЫСЫН ЖАСАДЫ
27 наурызда Владимир Путин Украинада "уақытша басқару" енгізуді БҰҰ мен бірқатар елдердің бақылауымен ұйымдастыруды ұсынды. Оның пікірінше, бұл демократиялық сайлау өткізуге және халық сеніміне ие қабілетті үкіметті билікке әкелуге мүмкіндік береді.
"Бұл билікпен кейіннен бейбіт келісім бойынша келіссөздер жүргізуге болады", — деп атап өтті Путин "Интерфакс" агенттігіне берген сұхбатында.
Бұған дейін Путин бірнеше рет Владимир Зеленскийді заңды президент деп санамайтынын мәлімдеген болатын. Оның айтуынша, 2024 жылы өтуі тиіс президенттік сайлау мерзімінде өтпеген. Алайда Украина заңнамасы әскери жағдай кезінде кез келген сайлауды өткізуге тыйым салады.