Forbes әлемдегі ең бай адамдардың жаңартылған рейтингін жариялады. Биыл да тізімнің көшін әйгілі кәсіпкер, Tesla мен SpaceX-тің негізін қалаушы Илон Маск бастады, деп хабарлайды Ulysmedia.kz.
Журналдың мәліметінше, қазіргі уақытта әлем бойынша ең көп миллиардер АҚШ-та тұрады – 902 адам. Одан кейінгі орындарда Қытай мен Гонконг (516 миллиардер) және Үндістан (205 миллиардер) тұр.
Әлемдегі ең ауқатты жетеудің көшін Илон Маск бастады. 53 жастағы кәсіпкердің байлығы 342 миллиард долларды құрайды. Одан кейін Meta негізін қалаушы Марк Цукерберг 216 миллиард доллармен және Amazon-ның негізін қалаған Джефф Безос 215 миллиард доллармен жайғасты.
Рейтингтің 4-7 орындары мынадай:
Ларри Эллисон – Oracle корпорациясының негізін қалаушы, директорлар кеңесінің төрағасы, техникалық жетекші. Байлығы – 192 млрд доллар.
Бернар Арно – әлемге әйгілі Louis Vuitton мен Sephora-ны қамтитын LVMH сән және косметика империясының иесі. Байлығы – 178 млрд доллар.
Уоррен Баффет – инвестиция әлеміндегі ең табысты кәсіпкерлердің бірі. Байлығы – 154 млрд доллар.
Ларри Пейдж – Google-дың бас компаниясы Alphabet-тің экс-атқарушы директоры. Байлығы – 144 млрд доллар.
Айта кетсек, өткен жылы Forbes-тың жаңартылған тізімінде үздік үштікті Илон Маск, Джефф Безос және Марк Цукерберг бөліскен болатын.