Әлеуметтік желіде бір азаматтың курьермен болған оқиғасы қызу талқыға түсті. Асылхан есімді қолданушы тапсырыс беріп, курьермен қазақ тілінде сөйлеспегені үшін ескерту естігенін жазды. Бұл жағдай оны таңғалдырған. Кейін бұл жазба таралып, жеткізу қызметі автормен байланысқа шыққан. Нәтижесінде курьер жұмыстан босатылған, деп хабарлайды Ulysmedia.kz.
Әлеуметтік желіде Асылхан есімді азаматтың бөліскен оқиғасы жұрт назарын аударды. Асылхан есімді қолданушы осындай жағдайға тап болғанын жазды.
«Бүгін Magnum-нан ас-тағам жеткізіліміне тапсырыс бердім. Бәрі қалыпты: таңдадым, ақысын төледім, күтіп отырмын. Курьер келеді. Есік ашамын, сәлемдесемін, рақмет айтамын. Бірақ ол менен сұрайды:
— Атың кім?
— Асылхан.
Ойладым – заңды, тапсырысты тексеріп жатқан шығар. Бірақ келесі сұрақ мені шын мәнінде шок қылды:
— Қазақша сөйле!»
Пікір авторының айтуынша мұндай жағдай оның намысына тиіп кетіпті.
«Бұл – бәлкім, біреуге ұсақ түсініспеушілік болар. Бірақ мен үшін – шекараның бұзылуы. Сен менің туысым емессің, досым да емессің. Жай ғана ақысы төленген қызметті орындаған адамсың. Мен рақмет айттым, қоштастым. Сосын – бәрі осымен аяқталуы тиіс.»
Осы оқиғадан соң автор шағым жазбағанымен, әлеуметтік желідегі жазбасынан кейін қызмет көрсету компаниясы онымен байланысқан. Оған барған курьердің жұмыстан қуылғанын, енді қайтып жұмысқа алынбайтынын хабарлаған. Әрине, хабарлама орыс тілінде.
«Ал енді мен өзімді жаман сезініп отырмын. Біреу жұмысынан айырылған шығар. Қатты айтпайын демеген едім» – деп жазды Асылхан.
Желі қолданушылары Асылхан есімді азаматтың бұл әрекетін қолдамады. Керісінше бір азаматты жұмыссыз қалдырғанына айыптап бауырыңды жығып бердің деп сөгіп жатыр.