Ulysmedia.kz редакциясы жер ресурстарын басқару комитетінің төрағасы Мұрат Теміржанов туралы ақпарат іздеуге 30 наурызда кіріскен. Сол күні редакцияға ішкі дереккөз арқылы Теміржановтың ұсталғаны туралы хабар түскен болатын.
ТЕЛЕФОНЫ СӨНДІРУЛІ
Шенеуніктің телефоны сөндірулі, хабарласу мүмкін болмады. Ал оның атқарып отырған қызметі — елдегі ең маңызды ресурстардың бірі – жерге тікелей жауапты лауазым, сондықтан редакция бұл істі назардан тыс қалдырмауды жөн көрді.
РЕСМИ САУАЛ
Ulysmedia.kz тілшілері жағдайды анықтау үшін:
• Бас прокуратураға
• Ұлттық қауіпсіздік комитетіне (ҰҚК)
• Сыбайлас жемқорлыққа қарсы агенттікке (Антикор)
• Қаржы мониторингі агенттігіне (ҚМА)
• Ауыл шаруашылығы министрлігіне ресми сауалдар жолдаған.
“3 СӘУІРДЕН БЕРІ ЖҰМЫСТА ЖОҚ”
Ауыл шаруашылығы министрлігіндегілер ресми сауалға жауабында Теміржановтың қашаннан бері жұмыста жоқ екенін айтты.
- Жер ресурстарын басқару комитетінің төрағасы Теміржанов М.Б. 3 сәуірге дейін жұмыс орнында болған. 3 сәуірден бастап уақытша еңбекке жарамсыздыққа байланысты жұмыста жоқ. Өзге ақпарат министрлікте жоқ, делінген ресми хатта.
АНТИКОР НЕ ДЕЙДІ
Сыбайлас жемқорлыққа қарсы агенттік те ресми жауап беріп, Теміржановқа қатысты қылмыстық қудалау тіркелмегенін хабарлады.
ТЕЛЕФОНЫ ӘЛІ СӨНДІРУЛІ
Бұл жауаптардан кейін де редакция Теміржановтың телефонына қайта қоңырау шалған. Бірақ еш нәтиже жоқ — телефоны сол күйі сөндірулі.