Қазақстанда овербукингке – яғни, жолаушы билетті алдын ала сатып алғанымен, ұшаққа отырғызылмаған жағдайларға қатысты жаңа ереже күшіне енді, деп хабарлайды Ulysmedia.kz.
Бұған дейін бұл талаптар тек халықаралық рейстерге қатысты болса, енді ішкі бағыттар үшін де қолданылады.
МЕРЕКЕЛІК КҮНДЕРДЕ ҚАНШАМА ЖОЛАУШЫ ҰША АЛМАЙ ҚАЛДЫ?
Бас прокуратураның мәліметінше, соңғы екі жылда овербукинг жағдайлары жиілеп кеткен. Әсіресе, танымал бағыттар мен мереке, демалыс күндері жолаушылар жиі ұшаққа кіре алмай қалған. Мұндай сәттерде жиі даулар туындаған.
ЕНДІ ӘУЕ КОМПАНИЯЛАРЫ ЖАУАП БЕРЕДІ
Мәжіліс бұл мәселеге байланысты Әкімшілік құқықбұзушылық кодексіне өзгеріс енгізді. Жаңа нормаға сәйкес, ішкі рейстерде ережені бұзған авиакомпаниялар 50 АЕК көлемінде айыппұл төлейді. Бұл 2025 жылы 196 600 теңгеге тең.
БҰҒАН ДЕЙІН
SCAT әуе компаниясына жолаушылардың құқықтарын бұзғаны үшін айыппұл салынған.
Биыл 25 ақпанда «Өскемен– Астана» рейсінің жолаушылары ұзақ кешіккен. Күндізгі уақытта рейстің кешігуі сегіз сағаттан артық болғанына қарамастан, әуе компания оларды қонақ үйде уақтылы орналастыруды қамтамасыз етпеген.
Шығыс Қазақстан көлік прокуратурасы азаматтардың құқықтарының бұзылуына ден қойды. Тексеру қорытындысымен авиакомпания әкімшілік жауапкершілікке тартылды – ҚР ӘҚБтК-нің 567-бабының 2-бөлігімен 1000 АЕК немесе 3 932 000 теңге мөлшерінде айыппұл салынды.