Ватиканда жаңа Рим Папасын сайлайтын конклав ресми түрде басталды. Бұл шара — Католик шіркеуінің тарихындағы 267-ші понтификті анықтайтын маңызды рәсім, деп хабарлайды Ulysmedia.kz.
Reuters агенттігінің хабарлауынша, Сикстин капелласында өтетін сайлауға әлемнің 70 елінен келген 133 кардинал қатысуда — бұл осы уақытқа дейінгі рекордтық көрсеткіш.
САЙЛАУ ҚАЛАЙ ӨТІП ЖАТЫР
Әдеттегідей, Әулие Петр ғибадатханасында мерекелік месса өтті, содан кейін кардиналдар қызыл мантияларын киіп, Сикстин капелласына бет алды. Онда олар құпиялылықты сақтау туралы ант беріп, дауыс беруді бастайды.
Конклав кезінде кардиналдарға сыртпен байланыс жасауға қатаң тыйым салынған. Құпиялылықты сақтау үшін Ватикан радиосигналды бұғаттайтын жоғары технологиялық құрылғылар орнатқан.
ДАУЫС БЕРУ ҚАЛАЙ ЖҮРГІЗІЛЕДІ
7 мамырда тек бір ғана дауыс беру жоспарланған. Ертеңнен бастап күніне төрт ретке дейін дауыс беру өткізілуі мүмкін. Сикстин капелласының мұржасынан шыққан қара түтін – сайлау нәтиже бермегенін, ал ақ түтін мен шіркеу қоңырауының үні – жаңа Папаның сайланғанын білдіреді.
Соңғы 10 конклавтың орташа ұзақтығы үш күннен астам болған. Ешқайсысы бес күннен артыққа созылмаған. 2013 жылғы сайлау екі күнде аяқталған еді.
КІМДЕР ҮМІТКЕР
Қазіргі таңда нақты фаворит жоқ. Дегенмен Италиядан Пьетро Паролин мен Филиппиннен Луис Антонио Тагле басты үміткерлер ретінде аталып жүр. Сондай-ақ Франциядан Жан-Марк Авелин, Венгриядан Петер Эрдо, АҚШ-тан Роберт Превост пен Италиядан Пьербаттиста Пиццабалла да ықтимал кандидаттар қатарында.
Еске салайық, күні кеше келесі Рим Папасы тарихта алғаш рет Азиядан сайлануы мүмкін екенін хабарлаған едік.
ФРАНЦИСК
Рим Папасы Франциск инсульт пен жүрек жеткіліксіздігінен көз жұмды. NBC News мәліметінше, бұл туралы Ватикан берген өлім туралы ресми куәлікте жазылған.
Құжатта өлімнің себептері ретінде: миға қан құйылу (инсульт), кома және жүрек-қантамыр жүйесінің қайтымсыз күйреуі көрсетілген.
ФРАНЦИСК ТУРАЛЫ
Франциск — Католик шіркеуінің 266-шы понтифигі. Ол 2013 жылы сайланған болатын. Франциск — бұл лауазымға келген Латын Америкасынан шыққан алғашқы Папа, әрі иезуиттік орден өкілі ретінде алғаш рет тағайындалған понтифик.
Жақында ол өкпе дертіне байланысты, оның ішінде, бронхит пен пневмониямен ауырып, Римдегі Джемелли клиникасына жатқызылған еді. Бұл оның понтифик кезеңіндегі төртінші әрі ең ұзақ ауруханаға жатуы болған.
Айта кетейік, Рим папасы 2022 жылы қыркүйекте Қазақстанға келген болатын.