Жамбыл облысының сыбайлас жемқорлыққа қарсы қызметі экология департаменті басшысының ұсталғаны туралы ақпарат таратты, деп хабарлайды Ulysmedia.kz.
МӘН-ЖАЙ
Құзырлы орган өкілдері тіпті ұстау сәтінің видеосын да жариялаған: кадрда ақша купюралары, сондай-ақ күдікті мен арнайы қызмет өкілдерінің беттері бұлыңғырланған.
— Жамбыл облысы бойынша Сыбайлас жемқорлыққа қарсы қызмет экология департаменті басшысына қатысты сотқа дейінгі тергеуді аяқтады, — деп жазды облыстық Антикор қызметінің басшысы Ернар Макажанов Facebook парақшасында.
Ол ірі өнеркәсіп кәсіпорны өкілінен экологиялық заңнама талаптарын тексеру кезінде анықталған бұзушылықтарды жоюға мүмкіндік беру, сондай-ақ жалпы қамқорлық көрсету үшін пара алды деген күдікке ілінген.
Макажановтың айтуынша, тергеу аяқталып, іс сотқа жолданған. Алайда шенеуніктің аты-жөні мен пара сомасы жария етілмеген.
Ratel.kz мәліметінше, ұсталған ер адам — сол кезде экология департаментінің басшысы міндетін атқарған Темір Смағұлов. Бұған дейін ол осы департаментте бөлім басшысы, кейін басшының орынбасары – Жамбыл облысы бойынша бас мемлекеттік экологиялық инспектор болған. Пара алған сәтінде ол департамент басшысының креслосында отырған.