Гиннестің рекордтар кітабының рекордына енген ақтаулық спортшы Ильдар Ягьяев Ұлыбританиядан саяси баспана алды, деп хабарлайды Ulysmedia.kz.
Ильдар Ягьяевтің айтуынша, құжат оған Ұлыбританияда 5 жыл бойы тұру құқығын береді. Спортшы айлакер схемаларды қолданбағанын, адвокаттардың көмегіне жүгінбегенін және жалған некеге отырмағанын мәлімдеді.
Жүздеген күн – фермада 12 сағаттан, аптап ыстықта да, суықта да, ондаған бас тарту – «құжат жоқ», «мүмкіндік жоқ». Жүздеген түн – уайыммен, ертең не болатынын білмей үнсіздікпен өтті.
Бүгін менің қолымда – жай ғана құжат емес. Бұл мен жүріп өткен жолдың дәлелі. Мен бес жылдық тұруға рұқсат алдым. Саяхатқа арналған паспорт және ең бастысы – таңдау еркіндігі. Ақыры балаларымды құшақтай аламын. Олардың көздерін көріп, күлкісін естимін. Әке бұның бәрін сендер үшін жасады. Болашақтарың үшін. Әр күнің үшін.
Сенгендерге де, сенбегендерге де рақмет, – деп жазды ол.
2023 жылы Ильдар Ягьяев Ұлыбританияға жұмыс істеуге кеткен. Ауыл шаруашылығы алқаптарында және жылдам тамақтану мейрамханаларында жұмыс істеген.
Спортшының өзі айтқандай, 2023 жылдың жазында ол қазақстандық БАҚ-қа сұхбат беріп, спорт саласындағы сыбайлас жемқорлық, қаржыландырудың әділетсіз бөлінуі және олимпиадалық емес спорт түрлерінің өкілдеріне жасалатын қысым туралы ашық айтты. Осыдан кейін, Ильдардың айтуынша, ол белгісіз адамдардан қоқан-лоққы ести бастаған. Сол себепті ол телефон нөмірін ауыстырып, қауіпсіздігіне алаңдап, Ұлыбританиядан саяси баспана сұрауға шешім қабылдаған.
Ягьяев – стритлифтинг пен стритворкауттан жеті дүркін әлем чемпионы.