Дания ресми түрде әлемдегі ірі экономикалар арасында ең жоғары зейнет жасы белгіленген ел атанды. Ол жақта азаматтар 70 жасында зейнетке шығады, деп хабарлайды Ulysmedia.kz.
Осыған байланысты ЕО мен G20-ға мүше тағы 14 ел зейнет жасын көтеруге кіріскен.
Дания зейнет жасын 70-ке дейін ұлғайтып, G20 мен Еуроодақ елдері арасында рекорд орнатты. Бұл туралы РИА Новости ұлттық зейнетақы жүйелерін талдауға сүйене отырып хабарлады. Осылайша, Дания – зейнетке шығу жасы ресми түрде ең жоғары деңгейге жеткен алғашқы ел атанды.
Мұндай шешімнің басты себебі – халықтың қартаюы және зейнетақы қорларының тапшылығы. Көптеген дамыған елдер сияқты, Дания да демографиялық теңгерімсіздікке тап болды: елде егде жастағылар көбейіп, жұмыс істейтіндердің қатары азайып барады.
Айта кетейік, бұл шешім заңнамада алдын ала бекітілген. Дат зейнетақы жүйесінде зейнет жасы елдегі өмір сүру ұзақтығына «байланыстырылған»: халық неғұрлым ұзақ өмір сүрсе – зейнетке де соғұрлым кеш шығады.
Даниямен салыстырғанда басқа елдердің зейнетке шығу жасы әлдеқайда төмен: Австралия, Грекия және Нидерландта – 67 жас; Франция мен Словакияда – 64 жас; Швецияда – 63 жас; ал Үндістанда – 60 жас (алайда аймақ пен салаға байланысты өзгеруі мүмкін).