Президент Қасым-Жомарт Тоқаев Қазақстан халқын Құрбан айт мерекесімен құттықтады, деп хабарлайды Ulysmedia.kz.
ДӘЙЕКСӨЗ
– Ардақты ағайын!
Құрбан айт мерекесі құтты болсын!
Барша мұсылман қауым үшін қасиетті саналатын бұл мейрам – имандылық пен ізгіліктің символы.
Айт күндері мұқтаж жандарға жақсылық жасап, көмек көрсету – ата-бабаларымыздан жалғасып келе жатқан игі дәстүр. Асыл дініміз азаматтарды бір-бірін құрметтеуге, жақындарына жанашыр болуға үндейді. Бауырластық пен сыйластықты дәріптейді. Халқымыздың берекелі бірлігі осындай ізгі құндылықтардың арқасында нығая түседі.
Құрбан айт – ырысты ынтымақтың мерекесі. Біз еліміздегі тұрақтылықтың қадірін біліп, татулықты сақтау арқылы кез-келген сыннан сүрінбей өтіп, биік мақсаттарға жетеміз. Әділетті, Таза, Қауіпсіз әрі Қуатты Қазақстанды бірге құрамыз.
Құрбан айт кезінде айтылар дұға-тілектер қабыл болсын!
Әр шаңыраққа құт-береке қонсын!
Айттан айтқа аман-есен жете берейік!, – деді Тоқаев.
ҚҰРБАН АЙТ
Құрбан айт — ислам дініндегі ең маңызды діни мейрамдардың бірі. Ол Зүл-хижжа айының 10-күні басталып, үш күнге созылады. Бұл мейрам Меккедегі қажылықтың аяқталуына сәйкес келеді және мұсылмандар үшін үлкен рухани мәнге ие.
Құрбан айт кезінде мұсылмандар Алланың разылығы үшін мал (қой, ешкі, сиыр, түйе) шалып, оның етін үшке бөліп таратады: бір бөлігі – өз отбасына, екіншісі – туған-туыстар мен көршілерге, үшіншісі – мұқтаж жандарға беріледі. Бұл амал – Ибраһим (ғ.с.) пайғамбардың ұлы Ысқақты Алла разылығы үшін құрбан етуге дайын болған оқиғасына негізделген.
Мейрамның негізгі мақсаты – иман, қайырымдылық, бауырмалдық пен ынтымақтастықты арттыру. Құрбан айтта мұсылмандар ерте тұрып, айт намазын оқып, бір-біріне амандық-саулық тілеп, туыстық қатынастарды нығайтады.
Еске салайық, бұған дейін Қазақстан мұсылмандары діни басқармасы құрбан айтқа қатысты мәлімдеме жасаған еді.