Ұлттық Банк мамырда елде инфляция мөлшері өскенін мәлімдеді. Бұл көрсеткіш өткен айда 11,3 пайыз болған. Сәуірде ол 10,7 пайызды құраған, деп хабарлайды Ulysmedia.kz.
Жылдық инфляция 16 аймақта өскен. 3 аймақта баяулап, 1 аймақта бұрынғы мөлшерін сақтаған. Инфляцияның ең көп өсімі Алматы қаласында тіркелген. Ол 13,0 пайызды құраған.
Мамыр айында азық – түлік тауарларының бағасы жылдық мәнде 9,6% - ға дейін өсті (сәуірде-8,5%). Осы топтың тауарлары бағасының ең жоғары өсуі Ақмола облысында (11,4%), ал ең төмені – Алматы қаласында (8,0%) тіркелді. Мамыр айында азық-түлік емес тауарлар бағасының өсуі жылдық мәнде 9,0% - ға жетті (сәуірде-8,9%). Ең жоғарғы мән Түркістан облысында (14,2%), ең төменгі мән Павлодар облысында (5,4%) тіркелді, – делінген хабарламада.
Ақылы қызметтердің құны мамыр айында жылдық мәнде 16,0% – ға өскен. Сәуірде ол 15,7 пайыз болған. Сонымен қатар, бағаның өсуі жалпы республикалық деңгеймен салыстырғанда Алматы қаласында едәуір жоғары, 22,5 пайыз. Алматы облысында (11,3%) айтарлықтай төмен. Мамыр айында ел бойынша айлық инфляцияның өсуі 0,9 пайызды құраған.
Бұған дейін Қазақстанда инфляция бойынша болжам нашарлағаны хабарланған болатын.