Әзербайжан құрамасының мүшесі Малик Гасанов Астанада өткен бокстан әлем кубогында төрешілердің әділетсіз шешім шығарғанын мәлімдеді, деп хабарлайды Ulysmedia.kz Azerisport.com сайтына сілтеме жасап.
МӘН-ЖАЙ
Еуропа чемпионатының қола жүлдегері 1/16 финалда үндістандық қарсыласын сенімді түрде жеңгенін айтса да, төрешілер жеңісті үнді боксшысына берген.
— Астанадағы турнирде жақсы жұдырықтастым. Үндістандық қарсыласымды айқын басымдықпен жеңдім, бірақ төрешілер біртүрлі үнді боксшыларына жақтасып отырды. Сол себепті, мен жеңген жекпе-жекті қарсыласыма берді. Айтпақшы, менің салмақ дәрежемде кейін медаль алған боксшылар — осыған дейін өзім жеңген жігіттер, — деді Гасанов.
Малик Гасанов 65 келіге дейінгі салмақта өнер көрсетіп, үндістандық Абхинаш Джамвалдан жеңілген.
Кейін Джамвал финалға дейін жетіп, онда бразилиялық Юри Фалкау душ Рейске жол берді.