Президент қыз алып қашқандар үшін қылмыстық жауапкершілікті белгілейтін заңға қол қойды. Бұл туралы Адам құқықтары жөніндегі уәкіл Артур Ластаев мәлім етті, деп хабарлайды Ulysmedia.kz.
ТОЛЫҒЫРАҚ
Артур Ластаевтың айтуынша, енді заңнамада мұндай әрекеттерге нақты тыйым салынғаны көрсетілген, ал кінәлілер жазасыз қалмайды. Омбудсмен бұл заң тек әйелдерді ғана емес, сонымен қатар олардың қыздарын ұрлап кеткен әкелері мен ағалары және басқа да туыстарын қорғауға арналған. Сондай-ақ, оның айтуынша, бұл заң мәжбүрлі некелер тәжірибесінен бас тартуға және гендерлік теңдікті қамтамасыз етуге мүмкіндік береді.
– Сонымен қатар, «алып қашу» дәстүрінің көпғасырлық тарихына тән екі түрлі жағдайды ажырата білу қажет: біріншісі – қыздың өз еркімен қашып, тұрмысқа шығуға келісуі, ал екіншісі – оның еркінен тыс ұрланып, күштеп ұсталып отыруы. Неке – бұл тараптардың ерікті және толық келісімімен жасалатын тең құқықты одақ. Енді түзетулердің ресми жарияланып, күшіне енуін күтейік. Бұл тақырыпқа біз әлі де бірнеше рет оралатын боламыз деп ойлаймын, – деді Ластаев.
СТАТИСТИКА
Бұған дейін әділет министрлігінің қоғамдық тәртіп саласындағы заңнама департаментінің директоры Думан Сүлейменов Қазақстанда қыз алып қашуға қатысты қозғалған қылмыстық істің 94,3 пайызы сотқа жетпей тоқтайтынын айтқан болатын. Оның сөзінше, 2019-2023 жылдар аралығында қыз алып қашу фактісі бойынша 214 іс қозғалған. Оның 94,3 пайызы қылмыс құрамы жоқ деген себеппен жабылған. Тек 10 іс ғана сотқа жеткен.