Оңтүстік Кореяның бұрынғы президенті Юн Сок Ёльдің жары Ким Гон Хи жемқорлық пен парақорлыққа қатысы бар деген айыппен қамауға алынды. Ол – ел тарихында сот алдында қамауда тұрған алғашқы экс-бірінші ханым, деп хабарлайды Ulysmedia.kz Yonhap-қа сілтеме жасап.
Қаржылық алаяқтық пен заңсыз байланыстар
Тергеу дерегінше, Ким Гон Хи 2009–2012 жылдары акциялармен байланысты қаржылық алаяқтықты қаржыландырды деген күдікке ілінген. Сонымен қатар, 2022 жылғы президенттік сайлау алдында ықпалды делдалдан заңсыз түрде әлеуметтік сауалнама нәтижелерін алғаны айтылуда. Бұған қоса, ол бизнес өкілдері мен діни ұйымдардан қамқорлық көрсету үшін қымбат сыйлықтар алған деген күдік бар.
Тергеу барысы
Арнайы прокурорлар тобы Ким Гон Хиді қамауға алынғаннан кейін бес рет жеке тергегенімен, ол көп жағдайда үнсіз қалу құқығын пайдаланған. Айыптау қорытындысы оның алдын ала қамау мерзімі аяқталуға екі күн қалғанда жарияланды. Бұл шешім оның қамауда отыру уақытын алты айға дейін ұзартуға мүмкіндік береді.
Экс-президент қамауда отыр
Ким Гон Хидің күйеуі, экс-президент Юн Сок Ёль де қазір қамауда отыр. Ол былтыр желтоқсанда төтенше жағдай енгізіп, әскери төңкеріс жасауға талпынғаны үшін айыпталуда. Сот оның ісін «мятеж ұйымдастыру» бабымен қарап жатыр. Бұрынғы мемлекет басшысына өмір бойына бас бостандығынан айыру немесе өлім жазасы тағайындалуы мүмкін.