Қазақстан бокс федерациясының президенті Шахмұрат Мүтәліп даңқты боксшы, Олимпиаданың екі дүркін күміс жүлдегері Болат Жұмаділовке су жаңа көлік сыйлады, деп хабарлайды Ulysmedia.kz.
МӘН-ЖАЙ
Темір тұлпардың кілтін федерация басшысының көмекшісі Абзал Тұңғышбаев табыс етті. Бұл туралы журналист Нұрсейіт Жылқышыбай Instagram-парақшасында хабарлады.
Жылқышыбай спортшының көлікті болып қана қоймай, сонымен бірге Бекзат Сәттарханов атындағы спорт кешеніне жұмысқа қабылдағанын айтты.
Экс-боксшы жақында “Уақыт көрсетеді” бағдарламасына өмірі мен жұмысы туралы сұхбат берген еді. Жұмаділов Астанадағы шәкірттерін шағын ғана жертөледе жаттықтырып жүргенін айтты.
Ол тұрып жатқан үйдің техникалық бөлмесін бокс залына айналдырған. Бүгінде мұнда жастармен қатар ересектер де бокс әліппесін үйреніп жатыр. Дегенмен кадрлардан байқалғандай, залдың жағдайы нашар: қабырғалары ескірген, бокс қолғаптары мен жаттығу құралдары тозған.
– Үй тұрғындарына бұл жердің коммерциялық ұйым емес екенін, тек балаларға арналған тегін бокс үйірмесі екенін түсіндірдік. Қазір ешкім кедергі келтірмейді. Бірақ бұл ғимарат бізге тиесілі емес, кез келген сәтте “шығыңдар” десе, кетуге мәжбүрміз, – деді спортшы.
БОЛАТ ЖҰМАДІЛОВ КІМ?
Болат Жұмаділов – қазақ боксының тарихындағы ең танымал спортшылардың бірі. Ол 1973 жылы Оңтүстік Қазақстан облысында дүниеге келген. Қазақстанның еңбек сіңірген спорт шебері. 1996 жылы Атланта Олимпиадасында және 2000 жылы Сидней Олимпиадасында күміс жүлдегер атанды. Сондай-ақ 1999 жылғы әлем чемпионы. Кәсіпқой боксқа бармай, бар ғұмырын әуесқой боксқа арнады.
Спорттағы жетістіктерімен қатар, ол жас буынды тәрбиелеуге күш жұмсап келеді. Бүгінде Астанада балаларға тегін жаттығу өткізіп жүр.