Қазақстан үкіметі әлеуметтік масылдықпен күрес жариялады. Желтоқсан айына дейін күмәнді және тиімсіз әлеуметтік жеңілдіктер қолдау шараларының қатарынан алынып тасталмақ, деп хабарлайды Ulysmedia.kz.
Біртұтас стандарт әзірленеді
Премьер-министр Олжас Бектеновтің айтуынша, еңбек министрлігі мүдделі мемлекеттік органдар мен әкімдіктермен бірге 1 желтоқсанға дейін барлық өңірлер үшін әлеуметтік қолдау шараларының бірыңғай стандартын әзірлеуі тиіс.
– Барлық күмәнді және тиімсіз жеңілдіктер мен төлемдер қысқартылуы қажет. Біз әлеуметтік әділеттілікті сақтап, масылдық психологиясына қарсы шаралар қабылдаймыз. Үкіметтің міндеті – барлық азаматқа тең жағдай жасау. Ал халық еңбек етіп, өз-өзін және отбасын қамтамасыз етуге ұмтылуы тиіс. Мемлекет шынайы мұқтаж жандарға ғана көмектесуі керек, – деді ол.
Жасанды интеллект пен цифрландыруды енгізу
Премьер-министр барлық экономикалық салада мемлекеттік қызметтерді бақылау мен мониторингтің түбегейлі жаңа әдістерін құруды тапсырды. Ол үшін цифрландыруды және жасанды интеллект технологияларын кеңінен енгізу көзделіп отыр.
2025 жылдың 1 қарашасына дейін еңбек министрлігі жанынан әлеуметтік салаға арналған бірыңғай цифрлық платформа іске қосылады.
– Сондай-ақ мемлекеттік органдар әлеуметтік аудит тетіктерін енгізуді қарастыратын Әлеуметтік кодекске түзетулер бойынша заң жобасын жедел мақұлдауы тиіс, – деп атап өтті Бектенов.