АҚШ Украина әскерін 600 мың адаммен шектеуді ұсынды

ТОЛЫҒЫРАҚ

Дереккөздің сөзінше, жоспардағы 28 тармақтың басым бөлігі бойынша келісімге қол жеткізілген. Бірақ кемінде үш мәселе бойынша тараптардың көзқарасы түбегейлі бөлек.

Территория, әскер саны және НАТО мүшелігі

• Донбастағы бірқатар маңызды аймақтың Мәскеудің бақылауына өтуі мүмкін деген ұсыныс талқылануда. АҚШ бұған дейін Украинаға Ресей басқаратын демилитаризацияланған аймақ құруға келісуді ұсынған. Украиналық дереккөздің айтуынша, бұл бағытта «біршама ілгерілеу» бар, бірақ түпкілікті шешім қабылданбаған.
• АҚШ Украина қарулы күштерінің санын 600 мың адаммен шектеуді ұсынды. Киев әзірге мұндай идеяны қабылдауға дайын емес.
• Украина НАТО-ға мүшелікке ұмтылудан бас тартқысы келмейді. Мұндай қадам «жаман үлгі» болар еді және Ресейге альянсқа жаңа елдерді қабылдауға вето қою құқығын беріп қояды, ал Ресейдің өзі НАТО мүшесі емес.

«БҰЛ – ҰСАҚ-ТҮЙЕК ЕМЕС»

CNN атап өткендей, бұл үш мәселе – Украина үшін «қызыл сызықтар», ал Мәскеу үшін принципті талаптар. Трамп әкімшілігі мұны «ұсақ-түйек келіспеушіліктер» ретінде көрсетуге тырысқанымен, іс жүзінде бұл – шешуші мәселелер.

БӨЛЕК ТАЛҚЫЛАНАДЫ

Украина президенті Владимир Зеленский кеңсесінің кеңесшісі Михаил Подоляк DW арнасына берген сұхбатында АҚШ президентінің бейбіт жоспары ішінара өзгергенін, «кейбір сезімтал мәселелер бөлек арнаға шығарылғанын» растады. Оның айтуынша, территорияға және Киевтің қауіпсіздік кепілдіктеріне қатысты мәселелер ең алдымен АҚШ, Украина және Еуропа басшылары деңгейінде талқылануы тиіс.

ЗЕЛЕНСКИЙ КЕЗДЕСУДІ КҮТІП ОТЫР

Украина президенті кеңсесінің басшысы Андрей Ермак Axios басылымына берген сұхбатында Зеленский осы аптада Дональд Трамппен жеке кездесіп, соғысты тоқтатудың ортақ жоспарын келісуді көздеп отырғанын айтты.