Олимпиада чемпионы Елдос Сметовтің татамиге келесі жылы оралады. Бұл туралы ұлттық құраманың жаттықтырушы-кеңесшісі Роберт Мшвидобазде айтты, деп хабарлайды Ulysmedia.kz.
ТОЛЫҒЫРАҚ
Оның айтуынша, Сметовтің әлі қай жарысқа қатысатыны белгісіз.
– Елдос келесі жылы татамиге оралады. Оны ешқайда асықтырмаймыз. Спорттық бабына еніп, қалпына келген соң ғана қай жарысқа қатысатынын бірге ақылдасып шешеміз, – деді ол.
Сондай-ақ жаттықтырушы келер жылға құрам қалай жасақталадытынын және құрамаға жаңадан қосылатын балуандар туралы да айтты.
– Жақында Қазақстан чемпионаты өтті. Сол жарыстың нәтижесіне қарай құраманы жасақтап алдық. Командада ел біріншілігіне қатыспаған, бірақ негізгі құрамға кіретін мықты спортшылар да бар. Қазір өте жақсы ұжым қалыптасып келеді, бізге тек уақыт керек. Барлығы ойдағыдай боларына сенемін. Тағы қайталап айтарым: біздің басты мақсатымыз – Олимпиада, Азия ойындары және өз жерімізде өтетін әлем чемпионаты. Осы үш басты доданың барлығына біз 100 пайыз дайын боламыз, – деді Роберт Мшвидобазде.
Еске салайық, бұған дейін Қазақстан құрамасының дзюдо спортшысы Әбиба Әбужақынова Біріккен Араб Әмірліктерінің Абу-Даби қаласында өткен Grand Slam сериясындағы халықаралық турнирде қола жүлдегер атанғанын жазған едік.