Қазақстан әуе компаниялары Airbus ұшақтарының бағдарламалық жасақтамасын жаңартуды бүгін, 29 қарашада аяқтайды, деп хабарлайды Ulysmedia.kz.
ТОЛЫҒЫРАҚ
29 қараша таңертеңгі жағдай бойынша Air Astana компаниясының инженерлік қызметі EASA шығарған шұғыл ұшуға жарамдылық директивасына сәйкес, Air Astana және FlyArystan-ның 18 ұшағындағы бағдарламалық жасақтаманы жаңартуды сәтті аяқтады.
Азаматтық авиация комитетінің хабарлауынша, бағдарламалық жасақтаманы жаңарту 2025 жылғы 29 қарашаға дейін аяқталады деп жоспарланып отыр.
ДӘЙЕКСӨЗ
– Қазіргі уақытта Air Astana және FlyArystan тобында 38 Airbus ұшағы ұшып жүр. Оның бесеуіне жаңарту қажет емес. Үшеуі Ақтауда, төртеуі Астанада және алтауы Алматыда орындалады. Жоспарлы немесе жоспардан тыс техникалық қызмет көрсетуден өтіп жатқан ұшақтар үшін бұл директива тиісті техникалық қызмет көрсету аяқталғанға дейін орындалады деп жоспарланып отыр, – делінген хабарламада.
Астана және Алматы халықаралық әуежайлары қазіргі уақытта қалыпты жұмыс істеп тұр, рейстер орындалып жатыр.
Ведомство жолаушыларға әуе компанияларының веб-сайттарында рейстерінің мәртебесін алдын ала тексеруді ескертті.
АНЫҚТАМА
Төтенше ұшуға жарамдылық туралы директиваны Еуропалық авиация қауіпсіздігі агенттігі (EASA) 2025 жылдың 28 қарашасында шығарды және 2025 жылдың 29 қарашасында күшіне енді.
A320 ұшағындағы мәселе бүкіл әлем бойынша шамамен 6000 ұшаққа әсер етті.
Директива дереу және міндетті болып есептеледі. Ол күшіне енген сәттен бастап Airbus A319/A320/A321 барлық әуе кемелерін пайдаланушылар келесі ұшуға дейін Airbus нұсқауларына сәйкес биіктікті басқару блоктарының бағдарламалық жасақтамасын ауыстыруға немесе өзгертуге міндетті.
Осыған байланысты Air Astana және FlyArystan компаниялары басқаратын Airbus ұшақтарының ұшулары ұшу қауіпсіздігін қамтамасыз ету үшін міндетті жаңартуларды жүргізу мақсатында базалық әуежайларында кейінге қалдырылды.
Еске салайық, бұған дейін Азаматтық авиация комитеті 29 қарашаға қараған түні Air Astana және FlyArystan жолаушыларына үндеу жасап, жоспарлы жұмыстарға байланысты сабыр сақтауды сұраған еді.