Бүгін Мәжілісте тиісті заң жобасы таныстырылды. Оны депутат Нартай Сәрсенғалиев ұсынды. Оның айтуынша, қазіргі уақытта адам өмірін сақтандырып, жол апатынан қаза тапқан жағдайда сақтандыру төлемінің ең жоғарғы мөлшері шамамен 7 миллион теңгені құрайды, деп хабарлайды Ulysmedia.kz.
ТОЛЫҒЫРАҚ
Депутаттар бұл соманы екі есеге арттыруды ұсынып отыр. Мәжіліс депутатының сөзінше, заң жобасын Үкімет қолдаған.
— Біз қазір осы соманың екі есеге өсуін талап етеміз. Егер ересек адам қаза тапса, сақтандыру компаниясы төлемді 15 миллион теңгеге дейін жеткізуі тиіс. Сондай-ақ жол-көлік оқиғасы салдарынан мүгедектік алғандарға берілетін төлемді де екі есеге арттырамыз, — деді ол.
МҮГЕДЕКТІК ТОПТАРЫНА БЕРІЛЕТІН ТӨЛЕМДЕР
Атап айтқанда, бірінші топтағы мүгедектігі бар адамдар үшін төлем мөлшері 1600 айлық есептік көрсеткіштен 3200 айлық есептік көрсеткішке дейін өседі — бұл шамамен 12,5 миллион теңге. Екінші топтағы мүгедектер үшін төлем 1200-ден 2400 айлық есептік көрсеткішке (9,4 миллион теңге) артады, ал үшінші топ үшін 500-ден 1000 айлық есептік көрсеткішке (3,9 миллион теңге) дейін көтеріледі.
ЖАҢА НОРМА ЖӘНЕ ЖАҚЫНДАРҒА ТӨЛЕМ
Депутат жобаның қаза болған адамның туыстарына төлем жасауға да қатысты екенін атап өтті. Бүгінде егер қаза болған ересек адамның кәмелетке толмаған балалары болмаса, сақтандыру төлемі көбіне берілмейді.
Жаңа заң жобасында бұл норманы өзгерту ұсынылған: қаза болған жағдайда төлемді оның жақындары — жұбайы немесе ата-анасы алуы тиіс, балалардың бар-жоғына қарамастан.
АВТОКӨЛІК САҚТАНДЫРУЫ ТУРАЛЫ
Нартай Сәрсенғалиевтің айтуынша, рөлде отырған адамдарды да ескеру маңызды. Көлік түрлері көп, ал қымбат автокөліктерде тіпті бір ғана шамның бағасы 1–2 миллион теңгеге жетуі мүмкін. Мұндай шығындарды өтеумен сақтандыру компаниялары айналысады.
— Қазіргі төлем мөлшері өте аз. Осы себепті азаматтар шығынды жабу үшін несие алуға мәжбүр, себебі сақтандыру төлемі жеткіліксіз. Нәтижесінде адамдар өз қаражатынан қосымша төлейді. Қазір ең жоғарғы төлем 600 айлық есептік көрсеткішке дейін, бұл шамамен 2 350 000 теңге. Біз бұл соманы екі есеге арттыруды ұсынамыз, сонда ең жоғарғы төлем 4 718 000 теңге болады, — деді депутат.
БҰҒАН ДЕЙІН
Қазақстанда «такси жүргізушісі» ұғымын ресми түрде енгізіп, олардың мәртебесін, құқықтары мен міндеттерін заң жүзінде бекіту туралы ұсынысты Мәжіліс депутаты Елнұр Бейсенбаев жасады.