Ресейдің шабуылынан кейін Киевтегі шамамен 6000 көпқабатты үй жылусыз қалды, деп хабарлайды Ulysmedia.kz.
ТОЛЫҒЫРАҚ
Қала мэрі Виталий Кличко тұрғындарды уақытша ауылдық жерлерге, баламалы энергия көздері бар аймақтарға көшуге шақырды. Оның айтуынша, қалада су беру жүйесінде де ақаулар бар.
ӘЛЕУМЕТТІК НЫСАНДАР
Ауруханалар мен перзентханалар мобильді қазандықтарға қосылған. Қалалық қызметтер төтенше жағдай режимінде жұмыс істеп жатыр. Алдағы күндері ауа райы да күрделі болмақ: Киевте температура минус сегіз градусқа дейін төмендеді.
ШАБУЫЛДЫҢ САЛДАРЫ
9 қаңтарға қараған түні Ресейдің зымыран және дрон соққылары салдарынан төрт адам қаза тауып, 24 тұрғын жараланды. Бірнеше снаряд тұрғын үйлерге түскенін AFP агенттігі хабарлады.
«ОРЕШНИК» ЖҮЙЕСІ ҚОЛДАНЫЛДЫ
Ресей қорғаныс министрлігі Украинаға орта қашықтықтағы «Орешник» атты жылжымалы зымыран кешенімен қоса ауқымды соққы жасалғанын мәлімдеді. Украина қарулы күштерінің әуе күштері Львов облысында да жарылыстар тіркелгенін хабарлады.
ХАЛЫҚАРАЛЫҚ ҚАДАМДАР
Украина сыртқы істер министрі Андрей Сибига әлеуметтік желіде Киев халықаралық әрекеттерді бастайтынын жазды. Оның ішінде – БҰҰ Қауіпсіздік Кеңесінің шұғыл отырысы, Украина–НАТО кеңесі, сондай-ақ Еуропалық одақ, Еуропа кеңесі және Еуропадағы қауіпсіздік және ынтымақтастық ұйымы аясындағы жауапты шаралар бар.