Иранда өтіп жатқан жаппай наразылықтар кезінде қаза тапқандар санына қатысты жаңа мәліметтер жарияланды, деп хабарлайды Ulysmedia.kz.
ТОЛЫҒЫРАҚ
АҚШ-тағы Адам құқықтарын қорғау белсенділерінің жаңалық агенттігінің (HRANA) дерегіне сәйкес, қаза тапқандар саны 116 адамға жеткен. Ислам Республикасындағы наразылық акциялары 14 күннен бері жалғасып келеді.
Қаза тапқандардың арасында қауіпсіздік күштерінің 37 қызметкері, төрт медицина қызметкері және бір прокурор бар. Сонымен қатар 2 600-ден астам адам түрлі жарақат алған, ал ұсталғандардың жалпы саны 2 638 адамнан асқан.
Иран билігі әзірге қаза тапқандар мен жараланғандар саны туралы ресми ақпарат жариялаған жоқ. Бұған дейін, 10 қаңтар күні HRANA 66 адамның қаза тапқанын хабарлаған еді.
КОНТЕКСТ
2025 жылдың желтоқсан айының соңынан бері Иранда терең экономикалық дағдарысқа байланысты жаппай наразылық толқыны жалғасып келеді. Акциялар 28 желтоқсанда Тегерандағы саудагерлердің ереуілінен басталды. Олар ұлттық валютаның рекордтық құнсыздануына қарсы шықты: кейінгі бір жылда иран риалы доллармен салыстырғанда шамамен 50% арзандады, ал жылдық инфляция 42,5%-ға жетті.
Азық-түлік бағасы 70%-дан астамға қымбаттап, халық пен бизнес үшін экономикалық ахуал мәз болмай тұр. Әуеліде базардағы саудагерлер бастаған наразылықтар тез арада университеттер мен өзге қалаларға таралып, саяси сипат алды. Шерушілер Иранның жоғарғы көшбасшысы Әли Хаменейге қарсы ұрандар айтып, исламдық режимді құлатуға үндеп жатыр.