Украина президенті Владимир Зеленский 20 қаңтар күні Давоста өтетін Дүниежүзілік экономикалық форумға тек АҚШ-пен қауіпсіздік кепілдігі жөніндегі құжаттарға қол қойылған жағдайда және «өркендеу жоспары» (яғни соғыстан кейінгі қалпына келтіру бағдарламасы) бекітілсе ғана баратынын айтты, деп хабарлайды Ulysmedia.kz.
ТОЛЫҒЫРАҚ
Ол мұны Киев пен басқа өңірлерге жасалған Ресейдің кезекті жаппай шабуылының салдарын жою жұмыстарымен түсіндірді.
«Әрине, бұл жағдайда мен экономикалық форумды емес, Украинаны таңдаймын. Бірақ бәрі кез келген сәтте өзгеруі мүмкін. Себебі украиндар үшін бұл соғысты аяқтау өте маңызды», – деді Зеленский журналистерге WhatsApp чаты арқылы.
Оның айтуынша, Ресейдің 20 қаңтарға қараған түні жасаған шабуылының салдарын жоюға 80 миллион еуро қажет.
ҚАУІПСІЗДІК ҚҰЖАТТАРЫ ЖӘНЕ ҚАЛПЫНА КЕЛТІРУ
Сол күні Зеленский Telegram желісінде де ұқсас мәлімдеме жасады.
«Украина барлық серіктестермен кездесуге дайын, егер ол кездесулер адамдардың өмірін қорғауға және қауіпсіздікті қамтамасыз етуге көмектессе. Біздің команда АҚШ-пен қауіпсіздік кепілдігі мен қалпына келтіру құжаттарына қол қою үшін барлық қажетті дайындықты жасады», – деп жазды ол.
Президенттің айтуынша, Давостағы кездесулер нақты адамдарға, қалалар мен ауылдарға көбірек қорғаныс бере алса, Украина форумға қатысады. Ал егер серіктестер дайын болмаса, украин делегациясы елге нақты пайда әкелетін істерге назар аударуы тиіс.
Зеленский үш басты бағытты атады: әуе шабуылына қарсы қорғаныс жүйесіне арналған зымырандар, энергетикалық жабдықтар және майдан мен қауымдарға көмек көрсететін қолдау пакеттері.
«Әрбір украин шенеунігі, барлық өкілдер қазір нақты нәтижелер көрсетуі тиіс – өз мемлекетімен, өз халқымен бірге болып, міндетін орындауы қажет», – деді ол.
РЕСЕЙДІҢ ШАБУЫЛЫ
20 қаңтарға қараған түні Ресей Украинаға бір «Цирконий» кемеге қарсы зымыранын, Брянск пен Ростов облыстарынан ұшырылған 18 «Искандер-М/С-300» баллистикалық зымыранын және Волгоград облысынан жіберілген 15 Х-101 қанатты зымыранын қолданды.
Сонымен қатар Ресей 339 ұшқышсыз аппаратты, оның ішінде шамамен 250 «Shahed» дронын іске қосты. Бұл дрондар Курск, Орел, Миллерово, Приморско-Ахтарск, Шаталово, Брянск аймақтарынан, сондай-ақ аннексияланған Қырымдағы «Гвардейское» авиабазасы мен Чауда мүйісінен және Донецк өңірінен ұшырылған.