22 қаңтар күні Америка Құрама Штаттарының президентінің арнайы өкілі Стивен Уиткофф пен Дональд Трамптың күйеу баласы Джаред Кушнер Ресей президенті Владимир Путинмен Мәскеуде жүздеседі, деп хабарлайды Ulysmedia.kz.
ТОЛЫҒЫРАҚ
Бұл туралы Уиткофф 21 қаңтарда CNBC телеарнасына берген сұхбатында мәлімдеді, оның сөзін Reuters агенттігі жариялады
«Біз бейсенбіде (Путинмен) кездесеміз. Бұл кездесуді Ресей тарапы сұрап отыр. Менің ойымша, олар маңызды мәлімдеме жасайды», — деді Уиткофф. Оның айтуынша, Ресейге ұшып келмес бұрын, 21 қаңтарда ол Украина өкілдерімен де кездеседі.
РЕСЕЙ ТАРАПЫНЫҢ РАСТАУЫ
Ресей президентінің баспасөз хатшысы Дмитрий Песков Трамп өкілінің сөзін растады: «Иә, шынында да, ертең президенттің жұмыс кестесінде осындай байланыстар бар», — деді ол РБК арнасына.
ДАВОСТАҒЫ КЕЛІССӨЗДЕР
Уиткофф пен Кушнер Мәскеуге Швейцарияның Давос қаласынан барады. Мұнда 19–23 қаңтар аралығында Дүниежүзілік экономикалық форум өтіп жатыр. 20 қаңтарда америкалық делегация Ресей президентінің инвестициялық-экономикалық ынтымақтастық жөніндегі арнайы өкілі Кирилл Дмитриевпен кездесу өткізді. Ресейдің «РИА Новости» агенттігінің хабарлауынша, Уиткофф бұл келіссөздерді «өте оң» деп бағалаған.
ЖАҢА САПАР ЖАЙЛЫ АҚПАРАТ
14 қаңтарда Bloomberg агенттігі дереккөздерге сүйене отырып, Уиткофф пен Кушнердің Мәскеуге сапар жасау мүмкіндігін қарастырып жатқанын жазды. Онда кездесудің осы айда өтуі ықтимал екені айтылған, бірақ жоспар түпкілікті бекітілмеген, мерзім Иран төңірегіндегі тұрақсыз жағдайға байланысты өзгеруі мүмкін екені ескертілген.
Осыған байланысты Песков пікір білдіріп, америкалық тараппен диалог жүріп жатқанын, ал сапар күндері келісілген бойда жүзеге асатынына үміт білдірген.
БҰРЫНҒЫ КЕЗДЕСУЛЕР
Өткен жылдың басында Дональд Трамп Ақ үйге қайта оралғаннан бері Уиткофф Путинмен алты рет кездескен. Соңғы келіссөз 2 желтоқсанда Мәскеуде өткен болатын.