23 қаңтар түні Ресейдің дрон шабуылдары салдарынан Донецк облысында төрт адам қаза тауып, тағы бес адам жараланды. Кривой Рог қаласында да соққылар бір тәулікке жуық жалғасып, жеті адам ауруханаға жеткізілді, деп хабарлайды Ulysmedia.kz.
РЕСЕЙДІҢ ЖАППАЙ ДРОН ҚОЛДАНУЫ
Украина Қарулы Күштерінің Бас штабының мәліметінше, Ресей бұл түні Украинаға қарсы 101 дрон жіберген. Олардың 76-сы атып түсірілген немесе басып тасталған, ал 19 дрон 12 түрлі нысанға соққы жасаған.
Донецк облысында Краматорск ауданына қарасты Черкасское елді мекеніндегі жеке үйлерге дрондар тиген. Облыстық прокуратураның хабарлауынша, соққы салдарынан 32 жастағы ер адам мен оның 5 жасар ұлы, сондай-ақ екі көршісі қаза тапқан. Жарақат алғандар арасында қаза болған баланың анасы, 34 жастағы жергілікті тұрғын және 12, 14, 16 жастағы үш жасөспірім бар.
Кривой Рог қаласына 70-тен астам дрон және "Искандер-М" баллистикалық зымыраны бағытталғанын қала қорғаныс кеңесінің басшысы Александр Вилкул мәлімдеді. Нәтижесінде жеті адам жарақат алып, ауруханаға жеткізілген: төртеуі ересек, жағдайы орташа ауырлықта, ал үшеуі балалар.
ШАХТАДАҒЫ ЖҰМЫСШЫЛАР МЕН ЭЛЕКТР ЖҮЙЕСІ
Шабуылдар салдарынан шахталарда 90-нан астам жұмысшы жер астында қалып қойған. Оларды жер бетіне шығару операциясы 10 сағаттан астам уақытқа созылды. Сонымен қатар, 3,5 мың абонент электр жарығынсыз қалған.
УКРАИНАНЫҢ ЖАУАП ШАБУЫЛЫ
Ресейдің Пензен облысында украиналық дрондар шабуылынан мұнай қоймасында өрт шықты. Аймақ губернаторы Олег Мельниченконың айтуынша, ресейлік әуе қорғаныс жүйелері төрт дронды атып түсірген, олардың бірінің құлауынан өрт басталған.
МӘЛІМЕТТЕРДЕГІ АЙЫРМАШЫЛЫҚ
Губернатордың деректері Ресей Қорғаныс министрлігінің ақпаратымен сәйкес келмейді. Министрлік мәлімдегендей, Пензен облысы үстінде тек бір украиналық дрон атып түсірілген. Бұдан бөлек, Брянск және Астрахан облыстарында бір-бір дрон, Воронежде екі, Белгородта жеті дрон жойылған. Белгород облысында дрон автокөлікке соғылып, жергілікті тұрғын жарақат алып, ауруханаға жеткізілгенін губернатор Вячеслав Гладков хабарлады.