Астана қаласының полициясы желтоқсан айының соңында мемлекеттік сатып алу порталында жалпы құны 176,7 млн теңге болатын үш жол талғамайтын көлік сатып алу туралы хабарландыру жариялаған. Люкс санатындағы бұл автокөліктер құқық қорғау органдарына «қорғалатын тұлғалар мен ресми делегацияларды алып жүру» үшін қажет, деп хабарлайды Ulysmedia.kz.
VIP-персоналарға арналған VIP-көліктер
Factcheck.kz журналистері полиция 31 желтоқсанда орналастырған сатып алуға назар аударды. Жаңа жыл қарсаңындағы «сыйлық» — әрқайсысының құны 58,9 млн теңге тұратын үш жол талғамайтын көлік.
Өтінімдер 8–15 қаңтар аралығында қабылданған. Конкурсқа тек бір ғана жеткізуші — «СарыарқаАвтоПром» ЖШС қатысқан. Қазіргі уақытта мердігермен келісімшарт әлі жасалмаған.
Сатып алу сипаттамасында полиция бұл көліктер ресми делегациялар мен VIP-персоналарды алып жүруге арналғанын түсіндірген. Яғни әңгіме жай қызметтік автокөлік емес, люкс санатындағы көліктер туралы болып отыр.
Президент кортежіне арналған автокөліктер
Техникалық тапсырмада автокөлік маркасы тікелей көрсетілмегенімен, сипаттамада берілген параметрлер арқылы журналистер қандай жол талғамайтын көлік туралы сөз болып отырғанын анықтаған.
— Құқық қорғау органдарына бензинмен жүретін, қозғалтқышы V8, көлемі кемінде 6,2 литр болатын жаңа қара түсті жол талғамайтын көліктер қажет. Қуаты — кемінде 420 ат күші. Беріліс қорабы — автоматты, әрі кемінде 10 сатылы болуы тиіс. Мұндай сипаттамалар кез келген жол талғамайтын көлікте кездесе бермейді және оның премиум сегментке жататынын аңғартады, — деп жазады Factcheck.kz.
Көліктердің ұзындығы бес метрден, ені шамамен екі метрден кем болмауы тиіс. Бұл талаптар әдетте үкіметтік кортеждерде қолданылатын америкалық SUV үлгілеріне сәйкес келеді.
— Салон жабдығына қойылатын талап та жоғары. Іші былғарымен қапталған, панорамалық төбесі, кілтсіз кіру және қозғалтқышты қашықтан іске қосу жүйесі болуы қажет. Сонымен қатар жүргізуші мен жолаушылар орындықтарының «есте сақтау функциясы», айна мен рөл бағанының жеке баптау жадысы көрсетілген. Үшінші қатардағы орындықтар электржетек арқылы жиналуы тиіс, ал артқы жолаушыларға жеке ақпараттық-ойын-сауық жүйесі қарастырылуы қажет, — деп атап өтті журналистер.
Мемлекеттік сатып алу құжаттарында көрсетілген барлық техникалық параметр люкс санатындағы Cadillac Escalade жол талғамайтын көлігінің сипаттамаларына толық сәйкес келеді.