Қазақстандықтарға қайырымдылық жасауға не кедергі

Қаржылық кедергілер азайды

Қазақстандық қоғамдық даму институтының зерттеуінше, 2021 жылы қаржылық шектеулер қайырымдылық жасауға басты кедергі болып саналған – бұл жауаптардың 52,5%-ын құраған. Яғни, көпшілік қайырымдылық жасауға ниеті болғанымен, қаржылық мүмкіндіктері жеткіліксіз екенін айтқан. Алайда 2025 жылы бұл көрсеткіш екі еседен артық төмендеп, тек 22,9%-ға жеткен. Бұл өзгеріс адамдардың қайырымдылыққа деген ниеті қаржы тапшылығынан емес, басқа факторлардан да шектелетінін көрсетеді.

Уақыт пен эмоция – жаңа кедергілер

Қазіргі таңда қайырымдылыққа кедергі жасайтын себептер қаржылық фактордан субъективтік факторларға ауысып отыр. Зерттеу көрсеткендей:

• Уақыттың аздығы – 24,8% респонденттер өздерінің бос уақыттарының шектеулі екенін айтып, қайырымдылыққа белсенді араласа алмайтынын жеткізген.
• «Бәріне көмектесе алмайсың» ұстанымы – 20,1% адам жеке көмектің шектеулі екенін, барлығына үлестіре алмайтынын айтып, қайырымдылыққа шектеулі түрде қатысуды жөн көрген.
• Эмоционалдық әсері – кейбір азаматтар өзгенің мәселесін жүректерінен өткізіп, негативке бой алдырғысы келмейтіндіктерін айтқан. Адамдар эмоционалды тұрғыдан қиын жағдайларға араласқысы келмей, психологиялық қорғаныс ретінде қайырымдылыққа аз қатысады.

Сенім деңгейі артып келеді

Сондай-ақ, зерттеулер көрсеткендей, көмекті үлестіру процесіне сенімсіздік танытушылардың саны азайған. Бұрын адамдар «бақылаудың болмауы» немесе қайырымдылық қаражатының дұрыс пайдаланылмауы мүмкіндігіне алаңдаған болса, қазір мұндай фактордың әсері әлдеқайда төмендеген. Бұл қайырымдылық ұйымдары мен платформалардың ашықтығы мен есептілігінің артқанының белгісі.