Жаңа ереже: Енді фильмдер прокатқа дейін тексеріледі

САРАПТАМАЛЫҚ КОМИССИЯҒА КІМДЕР КІРЕДІ?

Фильмдерді прокатқа шығар алдында арнайы сараптамалық комиссия тексереді. Ал оның құрамына мемлекеттік орган өкілдері мен түрлі мамандар – заңгерлер, психологтар және кино саласының сарапшылары кіреді.

Комиссия фильмдерде тыйым салынған контенттің бар-жоғын бағалайды. Мысалы, зорлық-зомбылықты насихаттау, араздық тудыру, мемлекеттің қауіпсіздігіне қатер төндіретін немесе заңнамаға қайшы өзге де ақпараттар тексеріледі. Сондай-ақ дәл осы комиссия фильмдердің жас санатын анықтайды.

КОМИССИЯНЫҢ МІНДЕТІ ҚАНДАЙ?

Комиссия мыналарды бағаламайды:

• фильмнің көркемдік деңгейі мен эстетикалық құндылығы;
• коммерциялық табыстылығы;
• саяси немесе идеологиялық ұстанымдары.

Сараптама қорытындысы бойынша мамандар фильмнің сипаттамасы, талдау нәтижелері мен ұсыныстар көрсетілген қорытынды дайындайды. Ал комиссия отырысының хаттамасында:

• фильм атауы;
• өндірілген ел;
• құқық иесі туралы мәлімет;
• қысқаша сипаттама;
• сараптама нәтижелері;
• жас санаты;
• комиссия ұсынымдары қамтылады.

Комиссия мүшелері фильм мазмұнын жария етпеуге және ресми шешім шыққанға дейін сараптама нәтижелерін таратпауға міндетті.

Құжатта сондай-ақ мүдделер қақтығысы болған жағдайда сарапшылардың фильмді қарауға қатысуына тыйым салынатыны көрсетілген. Мысалы, егер олар картина авторларымен байланысты болса.