Eurasian Resources Group (ERG) компаниясында ауқымды өзгерістер болуы мүмкін, деп хабарлайды Ulysmedia.kz. Financial Times деректеріне сүйенсек, Қазақстан үкіметі тау-кен саласындағы ірі холдингтің басшылығын ауыстырып, оны Президент Әкімшілігінің басшысы деңгейіндегі тұлғаға тапсыруды жоспарлап отыр. Бұл елдегі ең ірі активтерге ықпалдың қайта бөлінуіндегі маңызды қадам болуы мүмкін.
FT дереккөздерінің мәліметінше, ERG директорлар кеңесі осы жұмада компанияның бас атқарушы директоры (CEO) қызметіне Роман Склярды тағайындау туралы шешім қабылдауы мүмкін. Сонымен қатар, ол қаржы министрі Мәди Тәкиевпен бірге компанияның жоғары буындағы менеджментін түбегейлі жаңартуды қолға алмақ. Атап айтқанда, қаржы директоры, заң қызметінің басшысы және коммерциялық блок жетекшілерін ауыстыру жоспарланып отыр.
Осылайша, қазіргі бас директор Шухрат Ибрагимовтың қызметтен кетуі ықтимал. Бұған оның компаниядағы серіктес-құрылтайшылар үлесін сатып алу жөніндегі әрекетінің сәтсіз аяқталуы себеп ретінде қарастырылып отыр.
Батыс баспасөзі назар аударған негізгі мәселе — бұл жай ғана кадрлық ауыс-түйіс емес, тұтас ықпал жүйесінің өзгеруі. ERG құрылымы мен меншік құрамындағы өзгерістер Астананың ресурстық секторды жаңарту стратегиясымен байланыстырылып отыр.
Financial Times жазуынша, бұл үрдіс Нұрсұлтан Назарбаев кезеңімен тығыз байланысты болған тұлғалардың ірі активтерді басқарудан біртіндеп шеттетілуін білдіреді. Олардың орнын қазіргі саяси бағытқа барынша бейім жаңа ойыншылар алмастыруда.
Жағдайға қосымша интрига қосып отырған фактор — девелопер Шахмұрат Мұтәліповтің ERG-дің 40% акциясын сатып алу жоспары. Мәміленің құны шамамен 1,4 млрд долларды құрайды.
FT пікірінше, «жаңа меншік иесі + мемлекеттік менеджмент (Скляр)» тандемі арқылы үкімет холдингті жанама, жұмсақ түрде мемлекет ықпалына қайтару сценариін іске асыруы мүмкін. Бұған дейін осыған ұқсас үлгі Jusan Bank активтерінде де қолданылған болатын.
ERG — Қазақстан экономикасы үшін стратегиялық маңызы бар компания. Ол 60 мыңнан астам адамды жұмыспен қамтып, феррохром мен кобальт өндіру бойынша әлемдік нарықта жетекші орындардың бірін иеленеді.