Қазақстанда ұшатын таксилер мен ұшқышсыз әуе көліктерін дамытуға бағытталған құқықтық база жасақталып жатыр. Мәжіліс қалалық әуе мобильдігін реттейтін заңнамалық түзетулерді қабылдап, жаңа технологияларды енгізудің негізгі қағидаларын бекітті, деп хабарлайды Ulysmedia.kz.
МИНИСТРЛІК МӘЛІМДЕМЕСІ
Жаңа нормалар болашақта аэротаксилердің, жолаушылар тасымалдайтын дрондардың және ұшқышсыз жеткізу қызметтерінің жұмысын заң жүзінде реттеуге мүмкіндік береді. Сонымен қатар құжатта әуе қозғалысын ұйымдастыру, жолаушылардың жеке деректерін қорғау және көлік саласын цифрландыру мәселелері де қамтылған.
Заңнамаға бірқатар жаңа ұғым енгізілді. Олардың қатарында ұшатын таксилер мен ірі дрондардың тік ұшып-қонуына арналған арнайы алаңдар – вертипорттар, қала аумағында әуе арқылы жолаушы мен жүк тасымалдауды білдіретін қалалық әуе мобильдігі, сондай-ақ мұндай көліктерге арналған арнайы әуе кеңістігі мен ұшқышсыз аппараттардың қозғалысын бақылайтын басқару жүйелері бар.
Көлік вице-министрі Талғат Ластаевтың айтуынша, бұл өзгерістер жаңа буын авиациясын қауіпсіз дамытуға және бақылауға мүмкіндік береді. Әсіресе, тік ұшып-қонатын электрлі әуе көліктері (eVTOL) мен түрлі автоматтандырылған ұшу жүйелерін пайдалануға жол ашылады.
Құжатты әзірлеуге мемлекеттік органдармен қатар халықаралық сарапшылар да қатысқан. Жобаға АҚШ пен Оңтүстік Корея мамандары, әуежай инфрақұрылымы бойынша кеңесшілер және аэротакси өндірушілері тартылған.
САРАПШЫЛАР НЕ ДЕЙДІ?
Сарапшылардың пікірінше, көптеген мемлекетте мұндай технологиялар әзірге тәжірибелік жобалар мен жекелеген авиациялық нормалар арқылы ғана реттеліп келеді. Ал Қазақстан қалалық әуе мобильдігін заңнамалық деңгейде жүйелі түрде бекіткен алғашқы елдердің қатарына қосылды.
Мамандардың айтуынша, қалалық әуе көлігін енгізу үшін төмен биіктіктегі әуе кеңістігін тиімді пайдалану, цифрлық басқару жүйелерін құру, арнайы әуе дәліздері мен ұшып-қону алаңдарын салу қажет болады.
Бұл бағыттағы құқықтық негіз 2026 жылғы 8 мамырда қабылданған «Алатау қаласының арнайы құқықтық режимі туралы» Конституциялық заңда да көрініс тапқан. Құжатта пилотты және ұшқышсыз инновациялық әуе аппараттарын пайдалану тәртібі қарастырылған.
Дегенмен аэротаксилер мен жүк тасымалдайтын дрондарды кең көлемде қолдану бірден басталмайды. Жаңа технологиялар тәжірибелік сынақтар мен қауіпсіздік тексерулерінен толық өткеннен кейін ғана пайдалануға беріледі. Қазақстан осылайша болашақ әуе көлігі инфрақұрылымын қалыптастыруға бағытталған маңызды қадам жасап отыр.
Еске сала кетейік, бұған дейін Қазақстанда аэротакси пилоттық режимде 2026 жылдың алғашқы жартысында іске қосылатынын жазған едік.