Ұлттық банк төрағасы Тимур Сүлейменов инфляция үшін алдағы маусым қолайлы болады деп есептейді. Оның сөзінше, жаз және күз айларында азық-түлік бағасы әдетте төмендейді, деп хабарлайды Ulysmedia.kz.
Толығырақ
Азық-түлік инфляцияның негізгі құрамдас бөліктерінің бірі болғандықтан, егер олардың бағасы арзандаса, жалпы инфляция деңгейі де баяулайды.
Журналистер одан мораторий аяқталғаннан кейін коммуналдық тарифтердің көтерілуі инфляцияға қалай әсер ететінін сұрады.
– Тұрғын үй-коммуналдық шаруашылық тарифтері өте қызық санатқа жатады. Олардың тікелей әсері бар, себебі олар тұтыну бағалары индексіне тікелей енгізіледі. Сонымен қатар жанама әсері де бар. Өйткені жылу, электр энергиясы, сумен жабдықтау сияқты қызметтерді пайдаланатын бизнес олардың құнын өз өнімдері мен қызметтерінің өзіндік құнына қосады. Сәйкесінше, бұл шығындар кейін баға арқылы тұтынушыларға жүктеледі. Бұл – жанама әсер. Бұдан бөлек, коммуналдық қызметтер белгілі бір көрсеткіш қызметін атқарады. Яғни ай сайын коммуналдық төлем түбіртектерінің қалай өзгергенін оңай байқай аламыз, – деді Ұлттық банк басшысы.
Тимур Сүлейменовтің айтуынша, коммуналдық тарифтер халықтың инфляциялық күтулеріне айтарлықтай әсер етеді. Түбіртектегі төлем сомасы өскен кезде адамдар инфляцияның жоғары екенін байқап, оның одан әрі өсетінін күтеді.
Алайда Ұлттық банк төрағасының сөзінше, Үкіметпен коммуналдық қызмет тарифтерін өсірудің арнайы формуласы келісілген. Соған сәйкес тарифтердің өсімі жалпы инфляция деңгейінен 5 пайыз тармақтан артық болмайды.
2027 жылы тарифтердің өсуі инфляция деңгейінен 3 пайыз тармаққа ғана жоғары болады. Ал 2028 жылы коммуналдық тарифтердің өсімі инфляция деңгейімен теңестірілуі тиіс.
– Менің ойымша, дәл осы болжам инфляциялық күтулерді едәуір төмендетіп, реттелетін тарифтердің жалпы инфляцияға қосатын үлесін азайтады. Сондықтан біз өз мәлімдемемізде бұл жоспарлардың іс жүзінде толық орындалуының маңыздылығын ерекше атап өттік, – деп толықтырды сөзін Сүлейменов.