Астанада құрылыс компанияларының бірінің басшысынан ақша бопсалау фактісі тіркелді, деп хабарлайды Ulysmedia.kz.
МӘН-ЖАЙ
Тергеу барысында екі ер адамның кәсіпкерге екі апта бойы жүйелі түрде қысым көрсетіп, бопсалау арқылы ақша талап еткені анықталды. Олар талап етілетін соманы біртіндеп арттырып отырған.
Күдіктілер әлеуметтік желілерде компанияның іскерлік беделі мен қызметіне нұқсан келтіруі мүмкін мәліметтерді жариялаймыз деп қорқытып, нәтижесінде 80 млн теңге талап еткен.
ДӘЙЕКСӨЗ
– Заңсыз әрекеттердің жолын кесу мақсатында кәсіпкердің заңды өкілі полицияға жүгінген. Жедел-іздестіру іс-шаралары барысында полиция қызметкерлері ақша беру сәтінде екі күдіктіні қолға түсірді. Олардың бірі адвокат болып шыққан, – делінген хабарламада.
Аталған дерек бойынша қылмыстық іс қозғалып, оқиғаның барлық мән-жайы анықталуда. Күдіктілер уақытша ұстау изоляторына қамалды.