Алматы облысының Еңбекшіқазақ ауданында нөсер жауыннан кейін Түрген өзені арқылы өтетін көпірді су шайып кетті. Көпір бұған дейін апатты деп танылған, деп хабарлайды Ulysmedia.kz.
МӘН-ЖАЙ
Алматы облысы әкімдігі жағдайға түсінік берді. Әкімдіктің мәліметінше, Үлкен Алматы каналы бойындағы КВ-49 автожолының 54-шақырымындағы көпір 2024 жылы апатты деп танылып, көлік қозғалысы жабылған.
– 1 шілдеде жауын-шашынның көп түсуіне байланысты Түрген өзеніндегі су деңгейі көтеріліп, соның салдарынан апатты көпір құрылымының маңындағы топырақ шайылған, – делінген әкімдік хабарламасында.
ЖАҢА КӨПІР САЛЫНАДЫ
Билік өкілдерінің айтуынша, ескі көпірдің орнына жаңасы салынады. Жоба сараптамадан өтіп, құрылыс жұмыстарына қаржы бөлінген. Сондай-ақ мердігер мемлекеттік сатып алу нәтижесі бойынша анықталған.
Құрылыс-монтаж жұмыстары осы айда басталады деп жоспарланып отыр.