Астанадағы базарлардың бірінің аумағында орналасқан екі қабатты әкімшілік ғимаратта газ-ауа қоспасының жарылысы болып, үш адам зардап шекті, деп хабарлайды Ulysmedia.kz Төтенше жағдайлар министрлігіне сілтеме жасап.
ОҚИҒАНЫҢ МӘН-ЖАЙЫ
Ведомствоның мәліметінше, оқиға Байқоңыр ауданындағы Ш. Жиенқұлова көшесінде орналасқан базар аумағында болған. Алдын ала ақпарат бойынша, көлемі 50 литрлік композиттік газ баллонының герметикалығы бұзылып, соның салдарынан газ-ауа қоспасы жарылған.
– Оқиға орнына ТЖМ құтқарушылары жедел жеткен. Барлау жұмыстары барысында үш зардап шеккен адам анықталып, олар қажетті медициналық көмек көрсету үшін ауруханаға жеткізілген, – делінген хабарламада.
Жарылыс ғимараттың бірінші қабатында орналасқан тандыр самса пісірілетін бөлмеде болған. Салдарынан төбе жабындысының бір бөлігі мен есік ойығы опырылып түскен.
Қазіргі уақытта оқиғаның нақты себептері мен мән-жайын мамандар анықтап жатыр.