Қарағанды қаласының шекарасы Бұқар жырау ауданындағы жерлер есебінен кеңейтіледі. Үкімет қаулысына сәйкес, қала аумағына қосымша 281 гектар жер қосылады, деп хабарлайды Ulysmedia.kz.
МӘН-ЖАЙ
Қазақстан үкіметі Қарағанды облыстық мәслихатының шешімі мен облыс әкімдігінің Қарағанды қаласы мен Бұқар жырау ауданының шекарасын өзгерту туралы қаулысын мақұлдады.
Қазір Қарағанды қаласының аумағы – 49 780 гектар. Жаңа жерлер қосылғаннан кейін оның жалпы аумағы 50 061 гектарға дейін ұлғаяды.
Бұқар жырау ауданынан Қарағандыға барлығы 281 гектар жер беріледі. Оның шамамен 192,8 гектары жайылымдық жер болса, қалған 88,2 гектары өзге санаттағы жерлерге жатады.
Қарағанды – Қазақстандағы ең ірі қалалардың бірі әрі елдің маңызды өнеркәсіптік орталығы. Қалада шамамен жарты миллион адам тұрады.
КОНТЕКСТ
Бір ай бұрын Қырғызстан Қазақстанға мемлекеттік шекарадағы жер учаскелерімен алмасуды ұсынғаны белгілі болды. Қырғыз тарапы бұл бастаманы ұзындығы шамамен 150 шақырым болатын жаңа ақылы автожол салу жоспарымен түсіндірген.