«Отбасы банк» 2025 жылы қызметкерлері арасында анықталған сыбайлас жемқорлық фактілері туралы айтты. Кейбір қызметкерлер клиенттер мен делдалдарға көмектескені үшін, оның ішінде тұрғын үй кезегін жылжытып бергені үшін ақша алған. Сондай-ақ несие рәсімдеу үшін жалған құжаттар жасаған жағдайлар анықталған, деп хабарлайды Ulysmedia.kz.
Толығырақ
Бұл туралы банктің 2025 жылғы есебінде айтылған. Құжатқа сәйкес, қызметкерлер клиенттердің, риелторлардың, жеке сот орындаушылары мен нотариустардың мүддесін ілгерілеткені үшін заңсыз сыйақы алған.
Анықталған заң бұзушылықтардың қатарында тұрғын үй кезегін ақшаға жылжыту фактісі де бар.
Табыс туралы анықтамаларды қолдан жасаған
Банк филиалдарының бірінде тағы бір жағдай анықталған. Қызметкер клиенттердің несие алуға қабілетті екенін растау үшін олардың табысы туралы жалған құжаттар жасаған. Кейін бұл құжаттар несие алуға берілген өтінімдерге тіркелген.
Қызметкерлер жұмыстан шығарылып, материалдар полицияға берілді
Анықталған заң бұзушылықтарға қатысы бар барлық қызметкермен еңбек шарттары сенім жоғалуына байланысты бұзылған.
Сонымен қатар «Отбасы банк» бұрынғы қызметкерлерді қылмыстық жауапкершілікке тарту туралы құқық қорғау органдарына арыз берген. Қазір бұл фактілер бойынша бірнеше қылмыстық іс тергеліп жатыр.