17 тамызда Қазақстанның бірқатар өңірінде ауа райы құбылмалы болады. Елдің шығысы мен солтүстігінде жаңбыр, найзағай, бұршақ және қатты жел күтіледі. Ал оңтүстік пен батыста аптап ыстық сақталып, өрт қаупі жоғары болады, деп хабарлайды Ulysmedia.kz.
Мән-жай
Шығыс Қазақстан облысында жаңбыр жауып, найзағай ойнайды. Облыстың солтүстігі мен шығысында кей уақытта нөсер жауын болуы мүмкін. Күндіз бұршақ жауып, дауыл тұруы ықтимал, жел екпіні 23-28 м/с-қа дейін жетеді.
Абай облысында да осыған ұқсас ауа райы күтіледі. Солтүстік, шығыс және оңтүстік аудандарда жаңбыр жауып, найзағай ойнайды. Күндіз бұршақ пен дауыл болуы мүмкін. Жел екпіні 28 м/с-қа дейін күшеюі ықтимал.
Павлодар облысының батысы, солтүстігі және орталығында жаңбыр мен найзағай күтіледі. Батыста нөсер жаууы мүмкін. Күндіз бұршақ жауып, дауыл тұруы ықтимал.
Солтүстік Қазақстан облысының кей жерінде жаңбыр жауып, найзағай ойнайды. Күндіз бұршақ пен дауыл күтіледі, жел кей уақытта 25 м/с-қа дейін күшейеді. Түнде және таңертең тұман түсуі мүмкін.
Ақмола облысының шығысында түнде, ал батысы мен солтүстігінде күндіз жаңбыр жауып, найзағай ойнайды. Бұршақ пен дауыл болуы да ықтимал.
Көкшетауда күндіз жаңбыр жауып, найзағай ойнайды. Жел екпіні 20 м/с-қа дейін жетуі мүмкін.
Қостанай облысының солтүстігінде жаңбыр жауып, найзағай ойнайды. Түнде және таңертең батыс пен солтүстікте тұман түсуі мүмкін.
Астанада 17 тамызға арналған ескертуде айтарлықтай жауын-шашын көрсетілмеген. Күндіз солтүстік-батыстан соғатын жел 15-20 м/с-қа дейін күшейеді. Қалада өрт қаупі де жоғары күйінде қалады.
Алматы облысында күндіз ауа температурасы +35...+36 градусқа дейін көтеріледі. Алматы мен Қонаевта шамамен +35 градус болады. Таулы аудандарда өткінші жаңбыр жауып, найзағай ойнауы мүмкін, жел 15-20 м/с-қа дейін күшейеді.
Жетісу облысында да күн +35 градусқа дейін ысиды. Шығыс және таулы аудандарда өткінші жаңбыр жауып, найзағай ойнайды. Алакөл маңында жел екпіні кей уақытта 23-28 м/с-қа дейін жетуі мүмкін.
Ең қатты ыстық Маңғыстау облысының оңтүстігінде күтіледі - ауа температурасы +38 градусқа дейін көтеріледі. Бұл өңірде жел 15-18 м/с-қа дейін күшеюі мүмкін.
Түркістан облысының батысында күндіз шаңды дауыл тұруы ықтимал. Кей жерлерде жел 15-20 м/с-қа дейін күшейеді.
Жамбыл облысының таулы аудандарында қатты жел күтіледі. Таразда өрт қаупі өте жоғары деңгейде сақталады.
Батыс Қазақстан облысының солтүстігінде күндіз аздаған жаңбыр жауып, найзағай ойнайды. Түнде және таңертең кей жерлерде тұман түсуі мүмкін, жел 15-20 м/с-қа дейін күшейеді.
Ақтөбе облысының солтүстігі мен солтүстік-шығысында күндіз жел екпіні 15-18 м/с-қа дейін жетеді.
Атырау облысында жауын-шашын туралы ескерту жоқ, алайда өрт қаупі өте жоғары деңгейде қалады.
Өрт қаупі жоғары
17 тамызда аталған өңірлердің басым бөлігінде өрт қаупі жоғары немесе төтенше деңгейде сақталады.
Әсіресе Атырау, Маңғыстау, Түркістан, Жамбыл, Қызылорда облыстарында, сондай-ақ, басқа өңірлердің жекелеген аудандарында қауіп жоғары.
Қызылорда облысында төтенше өрт қаупі кемінде 19 тамызға дейін сақталады.