Бірқатар өңірде ауа райына байланысты ескерту жасалды

Қай өңірлерде жаңбыр жауып, найзағай ойнайды?

Ауа райы әсіресе еліміздің оңтүстігі мен оңтүстік-шығысында қолайсыз болады деп болжанып отыр.

Түркістан облысында жаңбыр жауып, кей жерлерде нөсерге ұласуы мүмкін. Сондай-ақ, найзағай ойнап, тұман түседі. Желдің жылдамдығы секундына 15–20 метрге дейін күшейеді. Қолайсыз ауа райы Шымкент пен Түркістан қалаларында да байқалады.

Жамбыл облысының оңтүстігі мен таулы аудандарында жаңбыр жауады. Күндіз найзағай ойнауы мүмкін. Тараз қаласында да жаңбыр жауып, күн күркірейді деп күтілуде.

Жетісу облысының шығысы мен таулы аймақтарында найзағай ойнап, жаңбыр жауады. Алакөл маңында желдің жылдамдығы секундына 15–20 метрге жетіп, кей уақытта екпіні 23–28 метрге дейін күшеюі ықтимал.

Қай қалаларда тұман түседі?

Түнде және таңертең Қарағанды, Жезқазған өңірі, Ақтөбе, Орал, Семей, Павлодар және Өскеменде тұман түседі деп болжанып отыр.

Сондай-ақ, Ақмола, Қостанай, Солтүстік Қазақстан, Атырау және Маңғыстау облыстарының кей аудандарында да тұман болуы мүмкін.

Ақтау қаласында тұман түнгі уақытта күтіледі.

Қай өңірлерде жел күшейеді?

Ақмола, Солтүстік Қазақстан, Батыс Қазақстан, Павлодар және Маңғыстау облыстарында желдің екпіні секундына 15–20 метрге дейін жетуі мүмкін.

Көкшетау мен Петропавл қалаларында да қатты жел соғады.

Ақтауда күндіз желдің екпіні секундына 15–18 метрге дейін күшейеді деп болжанып отыр.

Ал Жамбыл облысының таулы аймақтарында желдің жылдамдығы секундына 15–20 метрге жетеді.

Қай өңірлерде өрт қаупі сақталады?

Еліміздің кей аймақтарында жаңбыр жауғанымен, бірқатар өңірде жоғары және төтенше өрт қаупі әлі де сақталып отыр.

Әсіресе Ұлытау, Ақтөбе, Атырау және Қызылорда облыстарында жағдай күрделі болуы мүмкін.

Жезқазған, Атырау және Қызылорда қалаларында, сондай-ақ, облыстардың кей аудандарында төтенше өрт қаупі сақталады.

Бұдан бөлек, Батыс Қазақстан, Қостанай, Маңғыстау және Жетісу облыстарының жекелеген аудандарында табиғи өрт шығу қаупі жоғары болып отыр.