Қазақстан Үкіметі Абай облысының Курчатов қаласында жаңа электр станциясын салуды мақұлдады. Жобаның құны 881 млрд теңгеге бағаланып отыр, деп хабарлайды Ulysmedia.kz.
Станция әрқайсының қуаты 350 МВт болатын екі энергоблоктан тұрады. Оларды 2032 жылға дейін кезең-кезеңімен іске қосу жоспарланған.
Станция толық қуатына шыққаннан кейін жылына 5 млрд кВт·сағатқа дейін электр энергиясын өндіре алады.
Жаңа нысан қаланың негізгі энергетикалық орталықтарының біріне айналады деп жоспарланып отыр.
Курчатовта Ұлттық ядролық орталық, Ядролық технологиялар паркі, зерттеу реакторлары мен зертханалар, сондай-ақ қазақстандық КТМ термоядролық токамагы орналасқан.
Үкімет жаңа станция қаланы электр энергиясымен тұрақты қамтуға мүмкіндік беріп, ғылым, өнеркәсіп және қалалық инфрақұрылымды дамытуға қосымша қуат береді деп есептейді.
Жоба аясында шамамен 4,4 мың жұмыс орнын ашу жоспарланған.
Станция заманауи бу-күш қондырғыларымен және «таза көмір» технологияларымен жабдықталмақ. Сондай-ақ газды тазарту, зиянды шығарындыларды сүзу және шаңды басу жүйелері қарастырылған.
Инвестициялық келісім Энергетика министрлігі мен «ГРЭС Курчатов» ЖШС арасында жасалады. Тиісті қаулыға Премьер-министр Олжас Бектенов қол қойды.