Әл-Фараби атындағы Қазақ ұлттық университетінің Журналистика факультетінде төрт тәжірибелі оқытушының жұмыстан кетуі дау туғызды. Ұстаздардың бірі Темірғали Көпбай мұны факультеттегі бұрыннан келе жатқан келіспеушілікпен байланыстырса, университет әр оқытушыға қатысты шешімнің жеке себебі болғанын мәлімдеді. Ulysmedia.kz даудың мән-жайын анықтап көрді.
11 қыркүйекте ақын, журналист әрі оқытушы Темірғали Көпбай әлеуметтік желідегі парақшасында «Біз журфактан кеттік!» деген жазба жариялады.
Ол Журналистика факультетінен төрт оқытушы - профессор Кәкен Қамзин, доцент Темірғали Көпбай, аға оқытушылар Ермахан Шайхы мен Мұрат Шаймаран кеткенін хабарлады.
Темірғали Көпбайдың айтуынша, кейінгі бес жыл ішінде факультетте бес декан ауысып, мұндай тұрақсыздық оқу орнының академиялық және шығармашылық жұмысына кері әсер еткен.
Бұған дейін бір топ оқытушы факультет басшысын тағайындау ашық әрі әділ өтуін талап еткен.
Темірғали Көпбай жазбасында басшылық шешімдеріне қарсы пікір білдірген кей оқытушылар кейін қысымға ұшырады деп мәлімдеді.
Ол тіпті «қара тізім» жасалып, оған енген мұғалімдерге сабақ сағатын бермеу мәселесі көтерілгенін алға тартты.
«Осы тағайындауға байыпты қарсылық білдіріп, пікірін ашық айтқан ұстаздарды қудалау басталды. Кеңес заманындағыдай “қара тізім” жасалды. Енді, міне, сол “қара тізімге” ілінгендерге сағат бермейміз деп сіресіп отыр», — деп жазды Көпбай.
Ол бұл жағдайды бұрынғы келіспеушілік үшін «кек қайтару» деп бағалады.
Айта кетейік, бұл – оқытушының өз мәлімдемесіндегі айыптау. Оның «қара тізім» мен қысымға қатысты айтқанын растайтын құжат ашық жарияланған жоқ.
Кейін университет төрт оқытушының жұмыстан кетуіне қатысты пікір білдірді. ҚазҰУ мәліметінше, профессор Кәкен Қамзин мен доцент Темірғали Көпбаевтың еңбек шарттарының мерзімі аяқталған.
Ал аға оқытушы Ермахан Шайхы академиялық біліктілігін анықтау үшін өткізілген конкурстық комиссия отырысына қатыспаған және белгіленген рәсімнен өтуден бас тартқан. Аға оқытушы Мұрат Шаймаран болса, академиялық талаптарға сәйкесін анықтау үшін өткізілген конкурстан өте алмаған.
Университет мұны оқытушыларды жұмысқа қабылдаудың қалыпты тәртібі деп түсіндірді.
«Лауазымға қабылдау рәсімі жоғары оқу орындарында белгіленген тәртіпке сәйкес жыл сайын жүргізіледі. Арнайы құрылған конкурстық комиссия өтініш берушілердің ғылыми және оқу-әдістемелік еңбектерін, педагогикалық тәжірибесі мен дәріс беру біліктілігін және өзге де белгіленген талаптарға сәйкестігін бағалайды», — делінген ҚазҰУ мәлімдемесінде.
Университеттің академиялық мәселелер жөніндегі проректоры Алина Галеева тиісті шешімдердің қолданыстағы заңнама мен оқу орнының ішкі құжаттарына сәйкес қабылданатынын атап өтті.
Темірғали Көпбайдың мәліметінше, факультеттен кеткен ұстаздардың Журналистика факультетіндегі еңбек өтілі де аз емес. Кәкен Қамзин онда 32 жыл, Мұрат Шаймаран мен Ермахан Шайхы 20 жылдан, ал Темірғали Көпбай 12 жыл дәріс берген.