Украина президенті Владимир Зеленский Жоғарғы Рададан бас прокурор Руслан Кравченконы дереу қызметтен босатуды талап етті. Бұған дейін Кравченко Ұлттық сыбайлас жемқорлыққа қарсы бюроны (НАБУ) саяси қысым көрсетті деп айыптап, бюро директорына күдік келтірілгенін мәлімдеген, деп хабарлайды Ulysmedia.kz BBC-ге сілтеме жасап.
Кравченко НАБУ басшысын айыптады
Кравченко 7 қыркүйекте Бас прокуратурадағы жемқорлық дауына байланысты отставкаға кетуге өтініш берген. «Карфаген» ісі аясында ведомство басшыларының бірі ұсталып, бас прокурордың кабинетінде тінту жүргізілген.
Бір аптадан кейін Кравченко НАБУ директоры Семен Кривоносқа күдік келтіру туралы қаулыға қол қойғанын мәлімдеді. Оның айтуынша, іс құжаттарды қолдан жасау және баланы жалған асырап алуға қатысты.
Алайда НАБУ Кривоносқа ресми түрде күдік тағылмағанын айтып, Кравченконың мәлімдемелері процессуалдық емес, жария сипатта болғанын жеткізді.
Осыдан кейін Украина президенті қатаң мәлімдеме жасады.
– Бұл бас прокурордың бір ғана жолы бар – қызметтен кету. Мен оған осыны айттым, – деді Зеленский.
Ол Жоғарғы Рада депутаттарын бұл шешімді қолдауға үндеді.
Бас прокурор Украинадан кеткен
Кравченко шетелге кеткен. Оның өзі шетелде іссапарда жүргенін растады. Бас прокурор халықаралық серіктестерге Украинадағы антикоррупциялық жүйенің қазіргі жағдайы туралы айтып бермек.
Сонымен қатар Кравченко НАБУ мен Сыбайлас жемқорлыққа қарсы арнайы прокуратураны (САП) прокуратураға шабуыл жасады деп айыптап, бұған дейін оны тергеу жүргізуден Зеленскийдің өзі тежегенін мәлімдеді.
Антикоррупциялық органдар бұл айыптауларды жоққа шығарып, жағдайды тәуелсіз құрылымдарға жасалып отырған «жүйелі шабуылдың жалғасы» деп атады.
Украина БАҚ-тарының мәліметінше, Жоғарғы Рада бас прокурорды қызметтен босату мәселесін сейсенбі күні қарауы мүмкін.
Кравченко Украина Бас прокуратурасын 2025 жылдың маусымынан бері басқарды.