Петропавлдағы ботаникалық бақта есірткі жасырды деген күдік тудырған келушілер байқалған. Бақ қызметкерлерінің айтуынша, мұндай адамдар кейінгі кезде мұнда жиі келе бастаған, деп хабарлайды Ulysmedia.kz.
КТК мәліметінше, бақ қызметкерлері кейбір келушілердің өсімдіктерге, жануарлар мен құстарға мүлде қызықпайтынын байқаған. Олардан не іздеп жүргенін сұрағанда, кейбірі бірден қашып кеткен.
Оқиға орнына полиция шақырылған. Тәртіп сақшылары гүлзарлардың бірінен күмәнді орама тауып, оның ішіндегісін сараптамаға жіберді.
Биыл ботаникалық баққа ерекше қорғалатын табиғи аумақ мәртебесі берілген. Енді қызметкерлер тоғыз жыл бұрын әзірленген қауіпсіздікті күшейту жоспарын жүзеге асыруға үмітті.
Бақ директоры Артур Рязапов бейнебақылау камераларын өсімдіктерге зиян келтірмейтіндей етіп орнату керегін айтты.
- Камералар өсімдіктерге кедергі келтірмеуі керек. «Мына бұтақ камераға бөгет болып тұр, кесіп тастайық» деуге болмайды. Мұнда бәріне ғылыми тұрғыдан қарау қажет, - деді ол.
Еске салайық, бұған дейін Теміртауда есірткі өндірісін ұйымдастырды деген күдікке ілінген ер адам Ресейден Қазақстанға экстрадицияланған еді.