5 қазанда Қазақстанның басым бөлігінде ауа райы күрт нашарлайды. Синоптиктер жаңбыр, қар аралас жаңбыр, қатты жел, көктайғақ, тұман және бұрқасын болатынын ескертті. Кей өңірлерде жел екпіні секундына 30 метрге және одан да жоғары жылдамдыққа жетуі мүмкін, деп хабарлайды Ulysmedia.kz.
Қостанай облысында жаңбыр мен қар жауып, бұрқасын соғады, көктайғақ болады. Облыстың батысында, солтүстігінде және шығысында кей жерлерде жауын-шашын күшейеді. Түнде және таңертең тұман түсуі мүмкін.
Қостанай қаласында да жаңбыр аралас қар, бұрқасын және көктайғақ күтіледі. Күндіз кей жерлерде жауын-шашын күшейеді.
Солтүстік Қазақстан облысында да жаңбыр, қар, бұрқасын, көктайғақ және тұман болжанып отыр. Петропавлда да осындай ауа райы сақталады.
Ақмола облысында жаңбыр мен қар жауады, бұрқасын соғады. Түнде кей жерлерде тұман түсіп, көктайғақ болуы мүмкін.
Ең қатты жел Жетісу облысында күтіледі. Алакөл маңында жел екпіні секундына 30 метрге және одан да жоғары жылдамдыққа жетуі мүмкін.
Облыстың өзінде жаңбыр жауады, шығысы мен орталығында жауын-шашын күшейеді. Таулы аймақтарда жаңбыр мен қар күтіледі, түнде және таңертең тұман түседі.
Талдықорғанда түнде кей уақытта қатты жаңбыр жауады.
Шығыс Қазақстан облысы мен Абай облысында жел екпіні кей жерлерде секундына 23-28 метрге дейін күшейеді. ШҚО-ның солтүстігінде қатты жаңбыр, таулы аймақтарда жаңбыр аралас қар күтіледі.
Түркістан облысында түнде оңтүстікте және тау бөктерінде жаңбыр жауып, найзағай ойнайды. Таулы аймақтарда кей жерлерде жаңбыр мен қар түріндегі қатты жауын-шашын болады. Таңертең тұман түсуі мүмкін.
Жел екпіні секундына 23-28 метрге дейін жетеді. Түнде облыстың солтүстігі мен таулы аймақтарында топырақ бетінде 1 градусқа дейін үсік жүруі ықтимал.
Шымкентте түнде жаңбыр жауып, найзағай ойнайды. Жел екпіні секундына 15-20 метрге дейін күшейеді.
Жамбыл облысында түнде жаңбыр жауып, найзағай болады. Оңтүстігі мен шығысында қатты жаңбыр, таулы аймақтарда жаңбыр мен қар күтіледі. Жел екпіні секундына 23-28 метрге дейін жетуі мүмкін.
Ақтөбе облысында түнде жаңбыр мен қар жауады. Солтүстігі мен шығысында көктайғақ болады. Күндіз де кей жерлерде жауын-шашын сақталады.
Жел екпіні секундына 23-28 метрге дейін күшеюі мүмкін.
Ақтөбе қаласында түнде жаңбыр аралас қар жауып, көктайғақ болады. Күндіз жел екпіні секундына 25 метрге дейін жетеді.
Батыс Қазақстан облысының солтүстік-шығысы мен шығысында түнде жаңбыр мен қар күтіледі. Түнде және таңертең кей жерлерде тұман түседі.
Қызылорда облысының батысында, солтүстігінде және орталығында шаңды дауыл болады. Күндіз жел екпіні секундына 23 метрге дейін жетеді.
Түнде облыстың солтүстігі мен шығысында топырақ бетінде 1 градусқа дейін үсік жүруі мүмкін.
Қызылорда қаласында да күндіз шаңды дауыл мен қатты жел күтіледі.
Қарағанды облысында түнде және күндіз кей жерлерде жаңбыр мен қар жауады. Түнде және таңертең тұман түсіп, жел секундына 15-20 метрге дейін күшейеді.
Қарағанды қаласында да кей уақытта жаңбыр аралас қар жауады.
Ұлытау облысының батысы мен солтүстігінде жауын-шашын болжанады. Түнде және таңертең кей жерлерде тұман түседі.
Жезқазғанда жел екпіні секундына 15-20 метрге дейін күшейеді.
Жаңбыр мен күннің салқындауына қарамастан, бірқатар өңірде жоғары және төтенше өрт қаупі сақталады.
Мұндай ескерту Түркістан, Маңғыстау, Ақтөбе, Атырау, Қызылорда, Қарағанды, Жамбыл, Шығыс Қазақстан облыстарында, сондай-ақ Абай, Ұлытау және Жетісу облыстарында күшінде қалады.