«Аралтұз» тұз өндіру кәсіпорнының қызметкері билік өкілдеріне үндеу жолдады. Ол жалақының аздығына, тұз шамадан тыс көп өндіріліп жатқанына және экологиялық бақылаудың жеткіліксіздігіне шағымданды. Жұмысшы кәсіпорын қызметін тәуелсіз комиссия тексеруін талап етті, деп хабарлайды Ulysmedia.kz.
Әлеуметтік желіде жарияланған бейнежазбада ер адам кен орнындағы мол табиғи байлық пен жұмысшылардың ауыр жағдайы туралы айтты.
Оның сөзінше, өңірде табиғи қор мол болғанымен, жергілікті тұрғындардың тұрмысы жақсармай отыр.
«Бұл – біздің байлығымыз. Бірақ соған қарамастан, тұрмысымыз төмен, ал жалақымыз ең аз төленетіндердің қатарында», – деді ол.
Үндеу жасаған жұмысшы кен орнындағы тұз қоры тым қарқынды игеріліп жатқанын, ал табиғи байлықты сақтауға жеткілікті көңіл бөлінбейтінін алға тартты.
Жұмысшы кәсіпорынға қаржы құйған инвесторлардың жұмысына да наразылық білдірді. Бейнеүндеуде олардың қытайлық инвесторлар екені айтылғанымен, бұл ақпарат әзірге расталмаған.
Үндеу авторларының сөзінше, тұз өндіру жұмыстары тиісті экологиялық бақылаусыз жүргізіліп жатыр.
Олар мұндай әрекет кен орнындағы тұз қорының сарқылуына және қоршаған ортаға зиян келуіне әкелуі мүмкін деп алаңдайды.
Кәсіпорын қызметкері биліктен кен орнына тәуелсіз комиссия жіберуді сұрады. Ол комиссия жұмысшылардың еңбек жағдайын, экологиялық қауіпсіздікті және тұз өндіру талаптарының сақталуын тексеруі керек деп есептейді.
«Аралтұз» – Қазақстандағы ең ірі тұз өндіруші кәсіпорындардың бірі.
Компанияның негізгі өндіріс орны Қызылорда облысы Арал ауданындағы Жақсықылыш кентінде орналасқан.
Кәсіпорын ас тұзы мен техникалық тұз өндіреді. Өнімінің едәуір бөлігі шетелге экспортталады.
Бұған дейін компанияның Атырау облысындағы Индер көлінің тұз қорын игеруді жоспарлап отырғаны да хабарланған.
Алайда бұл жоба қоршаған ортаға кері әсер етуі мүмкін деген қауіппен жергілікті тұрғындардың алаңдаушылығын тудырған.