Алматы тұрғындары №12 қалалық аурухана ретінде белгілі Орталық қалалық клиникалық аурухананың тазалығы мен санитарлық жағдайына шағымданды. Бұған аурухана дәретханасында түсірілген видео себеп болды. Жазба авторының айтуынша, дәретханада тіпті қағаз бен сабын да болмаған, деп хабарлайды Ulysmedia.kz.
6 қарашада түсірілген видео әлеуметтік желіде тарады. Әйел аурухана дәретханасының жағдайын көрсетіп, қарапайым тазалық құралдарының жоқтығына наразылық білдірді.
«№12 аурухана басшылығына айтарым бар. Дәретхананың жағдайы мынау. Қағаз жоқ, сабын құтысын бассам, онда да ештеңе жоқ. Сонда салық төлеушілердің ақшасы қайда кетіп жатыр?» – деп ашуланды видео авторы.
Бұл жазба желіде қызу талқыға түсті. Кейбір алматылықтар бұл ауруханада өздері де осындай жағдайға тап болғанын айтты.
«№12 аурухананың тіпті ақылы палаталарының өзі адам шошырлық бараққа ұқсайды. Бұл аурухананың жағдайы өте нашар», – деп жазды желі қолданушыларының бірі.
Тағы бір әйел былтыр ауруханаға барған кезін еске алды. Оның айтуынша, жедел жәрдеммен жеткізілген науқастарға сұрамайынша бірреттік медициналық жаялық берілмеген.
«Тура 90-жылдардағыдай», – деді ол.
Орталық қалалық клиникалық аурухана әкімшілігі науқас көптігінен кейде дәретхана қағазы мен тазалық құралдары таусылып қалатынын мойындады.
Медициналық мекеменің мәліметінше, аурухананың қабылдау бөліміне күн сайын шамамен 400 адам жүгінеді.
Аурухана өкілдері ғимарат ішіндегі тазалық үнемі қадағаланатынын түсіндірді. Санитарлық жағдайды тексеру үшін қызметкерлер күніне үш рет – таңертең, түсте және кешке бақылау жүргізеді.
Келушінің шағымынан кейін аурухана әкімшілігі дәретхана қағазы мен антисептиктің болмауына байланысты тиісті шаралар қабылдаған.
«Қазір барлық кемшілік жойылып, жағдай ретке келтірілді», – деп хабарлады аурухана әкімшілігі.
Сондай-ақ, медициналық мекеме өкілдері келтірілген қолайсыздықтар үшін кешірім сұрап, тұрғындарға пікір білдіріп, кемшіліктерді көрсеткені үшін алғыс айтты.